Metro Fm-RCSB ; Sentru saúde Bucoli rejista kazu Tuberkuloze (TB) ema na’in sanulu (10) ne’ebé mak hala’o tratamentu insentiva iha sentru ne’e, suku Bucoli, postu administrativu Baucau Vila, munisípiu Baucau.

Pesoál saúde Bucoli Isaiás Napoleão da Silva hateten, kazu Tuberkuloze rejista iha sentru saúde Bucoli iha fulan trimestrál nia laran no husi ema na’in 10 ne’ebé konfirmadu na’in rua mak tratamentu kompleta ona, na’in rua mak mate no na’in neen seluk sei iha prosesu tratamentu hela.

“Agora ne’e daudaun sentru saúde Bucoli ba fulan ida ne’e hotu, ita kompleta kedas ba fulan trimestrál ne’ebé agora daudaun sentru saúde Bucoli rejista kazu tuberkuloze ema na’in sanulu, husi ema na’in sanulu, na’in haat mak bakteria konfirmadu husi mákina jenerfika rasik, na’in ida mak detekta husi ekstra pulmaunno na’in haat seluk detekta husi diagnosa klíniku”, hateten Napoleão ba rádiu komunidade Sahe Bucoli, Segunda feira (08/09/2025) ne’e.

Pesoál saúde ne’e mós hatutan, kazu TB ba tinan ida ne’e iha Bucoli sa’e maka’as kompara ho tinan kotuk.

“Komparasaun ba rejista kazu Tuberkuloze tinan kotuk no agora ita kompara iha tinan kotuk rejista kazu Tuberkuloze ema na’in hitu (7) maibé tinan ida agora ne’e  iha trimestrál de’it ita rejista kazu TB ema na’in 10, tinan ida ne’e kazu Tuberkuloze sa’e maka’as tanba pesoál saúde hala’o atividade tratamentu ba iha komunidade ho ida ne’e mak rejista kazu TB konfirmadu to’o na’in 10 iha trimestral ne’e”, tenik Nia.

Pesoál médiku tékniku analiza laboratóriu sentru saúde Bucoli kontinua hala’o servisu nafatin no tékniku tratamentu ba pasiente sira la’o hela tanba ekipamentu ba laboratóriu nian sufisiente hanesan riajente no ai-moruk ba TB hodi halo tratamentu ba pasiente sira.

Alén ne’e, difikuldade ne’ebé mak pesoál saúde Bucoli hasoru mak pasiente sirala koopera ho pesoál saúde sira, maibé sira kontinua nafatin fó tratamentu no hala’o sosializasaun liga programa kazu Tuberkuloze ba komunidade sira iha Bucoli.

Relasiona ho kazu Tuberkuloze Ministériu Saúde (MS) servisu hamutuk ho organizasaun Korea International Cooperation Agency (KOICA) bele minimiza kazu TB no tuir planu MS nian to’o iha tinan 2030, ho nune’e husi servisu hamutuk ne’e maneira ne’ebé parseiru hanorin hela ba médiku espesialista laboratóriu sira mak atu detekta másimu oinsá bele reduz moras Tuberkuloze iha Timor Leste.

*

Hakerek testu : Jally/Job

Editora : Ana