MetroFM/Ainaro; Autoridade Protesaun Civil (APC) identifika ona fatin hodi destaka membru korpu bombeiru sira iha postu administrativu Hatubuilico, munisípiu Ainaro, hodi responde ba peregrinu sira ne’ebé kada loron vizita Nai Feto Ramelau dalabarak hetan asidente to’o lakon vida no situasaun emerjénsia ruma.
Liuhusi reportajen jornalista rádiu komunidade Lian Tatamailau Ainaro, Ricardino Magno ba programa Metro Loron Ohin iha rádiu MetroFM, kinta feira (17/07/2025) ne’e, ekipa APC hamutuk ho autoridade postu Hatubuilico identifika ona edifísiu provizóriu ba membru bombeiru sira sai hanesan edifísiu própiu ida.
“Postu bombeiru tau ida iha ne’e tanba importante tebes iha akontesimentu barak iha ne’e vizitante sira ne’ebé mak mai iha Inan Ramelau, ida mós ahi sempre han rai iha parte ambiente Ramelau nian ne’ebé ministro interior hanoin oinsá iha tinan ne’e bele instala mós iha Hatubuilico hodi proteje, ami mai haree uluk rai, rai ne’ebé administradór entrega ami bele prepara nia konstrusaun iha tempu badak, depois ami mós husu ona edifísiu ida hodi bele instala uluk lai korpu bombeiros iha ne’e hodi hein konstrusaun foun ba edifísiu bombeiros”, hateten prezidente APC munisípiu Ainaro Jesuíno dos Reis Matos.
Sorin seluk administradór postu Hatubuilico Aniceto Marques de Orleans afirma, oferese edifísiu antigu ne’e hodi korpu bombeiru sira utiliza atu bele halo servisu iha postu ne’e.
“Oferese edifísiu antigu ida ne’e ba diresaun utiliza hein prosesu konstrusaun foun sira bele muda, harii postu bombeiros iha postu Hatubuilico ne’e hodi responde mós ba problema dezastre naturais iha postu ne’e, iha risku sira ne’ebé afeita ona ba ita-nia komunidade sira aprezenta postu ne’e bele tulun ona komunidade sira ne’ebé afetadu ba dezastre naturais iha ne’e”, afirma Aniceto.
Entretantu tuir planu Ministériu Interior sei rehabilita edifísiu tuan ne’e hafoin destaka membru sira ba iha postu administrativu Hatubuilico, iha tinan ne’e.
*
Hakerek testu : Elidio & Ricardino Magno
Editora : Ana
