MetroFM/RCL; British Council liuhusi UN Women iha Timor Leste hamutuk ho Ministériu Edukasaun tersa feira (30/09/2025) ne’e distribui Laptop rua ho marka Asus ba grupu alvu iha munisípiu Lautem.
Diretór jerál ensinu sekundária Jerál no tékniku vokasionál Deolindo da Cruz husu ba benefisariu sira atu utiliza Laptop ne’e hodi halo sira-nia matéria relasiona ho atividade empreendedorizmu nian iha sira-nia grupu ka iha fatin eskola tanba ne’e ba manorin na’in sira atu utiliza fasilidade ne’e hodi kapasita ba estudante sira kona-ba empreendedorizmu atu sira iha koñesimentu ba negósiu nian iha futuru.
“Mensajen ami rai hela ba ita-nia partisipante sira ba profesór sira husi sentru aprendijazen komunitária nian atu nune’e ida ba sentru aprendijazen komunitáriu nian ida ba eskola tékniku vokasionál hodi prepara sira-nia materiál no dezenvolve konteúdu iha ne’ebá hodi fó fali formasaun nune’e sira ne’ebé hetan formasaun ne’e bele fahe informasaun ba ema bele hasa’e sira-nia negósiu ho di’ak”, hateten diretór Deolindo.
Enkuantu manorin na’in husi eskola tékniku Vokasionál (ESTV) numeru 1 Lospalos Leopoldo Gustavo afirma, sei utiliza Laptop ne’ebé sira simu husi UN Women ne’e hodi fó kapasitasaun estudante sira iha eskola refere.
“Programa ida ne’e husi UN Women nian ajuda mai iha eskola tékniku vokasionál hodi fasilita ita-nia juventude sira liu-liu ba feto sira oinsá aprende di’ak lala’ok empreendedorizmu nian”, dehan Gustavo.
Iha fatin hanesan koordenadór sentru komunitária aprendijazen Lospalos Jonito Maria Fernandes agradese ba fasilidade ne’ebé sira simu ne’e sei utiliza no fó formasaun kona-ba partisipasaun feto iha negósiu nian ba foinsa’e sira iha sentru refere.
Entretantu, British Council liuhusi UN Women hamutuk ho Ministériu Edukasaun no reprezentante autoridade munisipál Lautem distribui ona Laptop 2 ho marka Asus ba eskola tékniku vokasionál númeru 1 Lospalos no sentru komunitária aprendijazen Lospalos hodi fasilita formasaun ba feto sira iha Lautem kona-ba vida negósiu nian iha munisípiu refere.
*
Hakerek textu : Nito
Editora : Ana
