MetroFM; Community Bassed Rehabilitations Network Timor Leste (CBRNTL) realiza workshop ho tema hametin sistema dadus no análize lakuna sira kona-ba direitu ema ho defisiénsia iha Timor Leste.
Diretora Ezekutivu CBRNTL Norberta Soares hateten, objetivu husi workshop ne’e mak asegura dadus inkluzivu ba ema hotu liu-liu ema ho defisiénsia iha instituisaun no organizasaun hotu iha Timor Leste.
“Ita hotu hatene katak Timor Leste iha kompremete no komprimisiu boot ba ratifikasaun konvensaun ba ema ho defisiénsia no Timor Leste rasik mós adopta planu asaun nasionál ba ema ho defisiénsia ba tinan sanulu to’o tinan 2030”, hateten diretora CBRNTL kinta feira (18/09/2025) ne’e iha salaun Tower Fatuhada.
Diretora ne’e mós afirma, CBRNTL observa katak iha dezafiu barak hasoru liu-liu liga ho oinsá atu akumula dadus sira ho ema defisiénsia iha programa governu no sosiedade sivil inklui organizasaun ba ema defisiénsia sira halo.
“Workshop ne’e hala’o durante loron rua nia objetivu bolu hamutuk parte governu liu-liu liña ministeriál sira no sosiedade sivil ho organizasaun ba ema defisiénsia sira oinsá atu fahe sira-nia opiniaun liga ba oinsá sira atu asegura sistema dadus sira ne’ebé inkluzivu iha instituisaun no organizasaun hotu, nune’e atu indentifika lakunas saida maka instituisaun sira hasoru liu-liu atu asegura dadus inkluzivu ba ema hotu liu-liu ema ho defisiénsia, objetivu seluk atu hametin kolaborasaun entre instituisaun governu no organizasaun ho sosiedade sivil sira iha servisu avansa ba inkluzaun iha Timor Leste”, tenik diretora ne’e.
Iha workshop ba loron rua ne’e akumula organizasaun no sosiedade hotu no partisipasaun husi governu mak sai hanesan implementadór ba asaun nasionál ba ema ho defisiénsia iha Timor Leste.
Alén ne’e, iha organizasaun sosiedade sivil ne’ebé servisu foku liubá asuntu feto no labarik inklui foku espesífiku ba advokasia direitu ema ho defisiénsia iha Timor Leste.
Partisipasaun iha workshop ida ne’e partisipa husi liña ministeriál sira no sosiedade sivil ho organizasaun sira ne’ebé servisu liga ba asuntu ema ho defisiénsia no hetan apoiu husi organizasaun internasionál sira hanesan UN WOMEN, UN Human Rights (Direitu Umanu) no United Nation Children’s Fund (UNICEF) iha Timor Leste.
*
Hakerek testu : Job
Editora : Ana
