RCS-Bucoli-MetroFM; Sentru Dezenvolvimentu Komunitáriu (CDC-sigla portugés) munisípiu Baucau servisu hamutuk ho International Labour Organization (ILO) ne’ebé hetan apoiu finanseiru husi União Europeia, fasilita formasaun ba komunidade suku Bucoli hamutuk ema na’in ruanulu (20) iha área agrofloresta iha ne’ebé foka liu ba komuditi nuu.
Objetivu husi formasaun ne’e atu hasa’e abilidade no koñesimentu kona-ba kuda, prodús pestisida orgánika, efetividade mikroorganizmu, prodús kompos orgániku no hafoin kolleta ba agrikultór sira liu-liu ba negósiu ki’ik no médiu iha Baucau iha área Agrofloresta.
Diretór CDC Baucau Vicente Matos Belo hateten, partisipante hetan matéria kona-ba téknika oinsá atu kria viveirus nuu no kuda ai-horis seluk.
“Partisipante ne’ebé tuir formasaun ida ne’e sira bele hatene teknik, distánsia kuda, maneira oinsá halo viveirus ba iha nuu hodi replanta fila fali nuu iha suku ida ne’e hodi nune’e bele fó benifísiu ba to’os na’in sira, aleinde ne’e sei hetan mós téknika oinsá atu kuda ai-horis seluk ho komuditi nuu ne’ebé bele kolleta iha fulan ida ka rua hodi responde ba nesesidade família, tamba nuu refere ho durasaun tempu tinan 7 ou 8″, dehan Diretór CDC.
Matéria sira ne’ebé fasilita mak livru manuál, preparasaun rai, téknika viveirus, oinsá atu kuda ho distánsia ne’ebé determina ona, tékniku oinsá prodús ai-moruk pestisida ba ai-horis no oinsá prodús adubu.
Diretór ne’e iha esperansa katak partisipante sira ne’ebé tuir formasaun ne’e sei halo mudansa ba komuditi nuu.
“Ha’u fiar katak tamba iha suku Bucoli sente ona benifísiu husi nuu, tamba dadaun ne’e trend liu halo mina Virgin Coconut Oil (VCO), maibé nia kakun no kulit ne’e sira sunu no soe de’it no nia sos sei fó han matak de’it ba fahi, maibé iha futuru hafoin formasaun ne’e karik sira iha interese ita kontinua, ha’u espera katak sira nu’udar to’os na’in sira sei dezenvolve komuditi nuu ne’e no dada tan komunidade seluk atu kuda nuu”, diretór ne’e hatutan.
Reprezentante ILO André Silvino Faria nu’udar ofisiál treinadór ba programa agrofloresta afirma, ILO nafatin apoiu grupu sira liuhusi CDC.
“Ita nafatin servisu hamutuk ho CDC tamba partisipante sira ne’e hanesan membru grupu CDC nian, entaun ILO kontinua apoiu tuir akordu ne’ebé asina ona ho CDC, ami sei apoiu liuhusi CDC nia observasaun saida mak ita presiza apoiu, nune’e ita bele haforsa tan sira-nia koñesimentu hodi bele halo produsaun atu bele tama iha merkadu ne’ebé kualidade no valór di’ak”, afirma reprezentante ILO.
Iha abertura ekipa CDC mós fasilita materiál balun ba parsipante sira atu bele utiliza iha prátika.
Formasaun ne’e, abertura husi reprezentante Administradór Postu Administrativu (APA) Baucau, no partisipa husi reprezentante diretór Ministériu Agrikultura Peska Pekuária no Floresta (MAPPF) Baucau, komandante eskuadra Baucau-Vila, reprezentante xefe suku Bucoli inklui partisipante sira no formasaun ne’e hala’o durante loron sanulu (10) iha sede Suku Bucoli.
*
Hakerek testu : Jally
Editora : Ana
