MetroFM-Díli : Conselho Nasional de Segurança e Soberania Alimentar Nutricional de Timor Leste (CONSSAN-TL), hala’o diskusaun meza redonda kona-ba hadi’a kualidade dieta ba labarik ho idade fulan neen (6) to’o ruanulu resin tolu (23) ka tinan ida fulan sanulu resin ida.
Diretór Ezekutivu CONSSAN-TL Komar Mendonça hateten, objetivu husi diskusaun ne’e atu garante labarik idak-idak iha oportunidade atu sai boot, buras no alkansa nia potensiál tomak hahú ho ai-han ne’ebé sira han.
“Ohin ita mai halibur iha fatin ida ne’e, la’ós reprezentante idaidak nia instituisoens maibé nu’udar mós lian koletivu ida dieta ba labarik timoroan sira, ki’ik liu no vulneravél liuhusi ita-nia sosiedade, ita hamutuk iha meza kabuar ho objetivu komun ida, atu garante katak labarik idaidak iha Timor Leste, iha oportunidade atu sai boot no buras atu alkansa sira nia poténsia hahú ho ai-han ne’ebé nutrisaun di’ak”, dehan Komar iha Hotel Timor, Díli, segunda feira ne’e (07/07/2025).
Diretór Ezekutivu ne’e hatutan, dieta labarik fulan 6-23 hanesan janela krítika ida ba labarik nia kresimentu no dezenvolvimentu ba nia kakutak enkuantu labarik iha Timor Leste ho pursentu sanulu resin lima (15%) de’it mak simu dieta mínimu aseitadu.
“Maibé labarik iha Timor Leste enjeral ho 15% de’it iha grupu ida ne’e mak simu dieta aseitadu mínimu, ne’e la’ós preokupasaun saúde de’it, maibé nu’udar dezafiu dezenvolvimentu nasionál, atu rezolve ida ne’e presiza ita-nia servisu hamutuk ho multi setorál no liña ministeriál sira, setór no sistema sira”, Nia afirma.
Komar husu entidade hotu-hotu ho lian ida de’it ba labarik sira vulneravél no ki’ik liu iha sosiedade nia leet.
Diskusaun ne’e hetan partisipasaun husi diretora jerál Ministériu Agrikultura no Peska, reprezentante Bee Timor Leste, Empreza Públika (BTL,EP), reprezentante Ministériu Saúde, reprezentante Prezidente Autoridade Munisípiu (PAM) Díli, inklui kargu xefia no funsionáriu CONSSAN-TL.
*
Hakerek na’in: Luis
Editora : Ana
