Viqueque/ Metro FM; Defisiente Inacio Pinto ho idade ualunulu resin lima (85), aldeia Welaku, suku Bahalara Wain, postu administrativu Viqueque Vila, munisípiu Viqueque, prodús nuu no tua tahan sai ai-saar kesak hodi fa’an.
Liuhusi rádiu komunidade povu Viqueque ba rádiu Metro FM, kuarta feira (09/07/2025) ne’e, Inacio Pinto hateten, maske moris ho kondisaun defisiénsia fíziku la hamate vontade no kreativu iha moris, maibé hanoin kontinua ho kreativu ba buka moris liuhusi dalan halo ai-saar kesak hodi fa’an ba ema seluk sosa.
“Ha’u halo ai-saar kesak ne’e tempu naruk ona, sasan sira ne’e ha’u halo husi nuu tahan nebe’e monu hau ba hili mai hasai nia kesak prodús hodi fa’an fali, kada ai-saar futun ida ha’u fa’an ba sentavus limanulu loron ida ne’e ema bele hola to’o futun lima to’o neen entaun ha’u hetan osan husi ne’e hodi sustenta ha’u nia moris”, dehan Inacio.
Inacio mós hetan osan husi governu fó liuhusi subsídiu ba idozu sira maibé nia dehan, ne’e kada fulan tolu mak governu halo pagamentu nune’e nia hili dalan ne’e hodi hetan osan ba moris loron-loron nian.
“Ha’u sente ho moris defisiente ne’e ha’u tenke halo netik buat ruma ba ha’u nia moris nune’e ha’u hili dalan ne’e hodi halo de’it ai-saar kesak ba fa’an, kleur ona ha’u halo atividade ne’e”, tenik Nia.
Entretantu, inovadór ne’e husu ho lian ne’ebé furak ba joven sira ne’ebé atu aprende halo ai-saar kesak bele hakbesik-an ba nia oinsá halo ai-saar kesak ne’ebé di’ak hodi bele ba fa’an iha merkadu.
*
Hakerek testu : Elidio/Lorença
Editora : Ana
