Ainaro/ Metro Fm; Ekipa konjunta (task force) munisípiu Ainaro kinta feira (10/07/2025) ne’e, hahú halo ona vasina ba asu sira iha munisípiu refere hanesan meiu ida hodi prevene virus raiva.
Liuhusi reportajen jornalista rádiu komunidade Tatamailau Ainaro Ricardo Magno ba programa Metro Ohin Loron katak ba rádiu MetroFM katak, ekipa konjunta kompostu husi Ministériu Agrikultura Pekuária Peska no Floresta, Ministériu Saúde no Servisu Administrasaun Munisípiu Ainaro nian hahú halo ona vasinasaun ba asu hanesan meiu prevensaun ba moras raiva nune’e labele hada’et ba komunidade iha munisípiu Ainaro.
Xefe departementu veternária munisípiu Ainaro Marcos de Araujo hateten, lansamentu ne’e parte dahuluk iha munisípiu ne’e hodi prevene moras raiva.
“Veternária munisípiu Ainaro simu ona aimoruk hodi halo vasina ba animál asu iha munisípiu ne’e, aimoruk ne’e ho naran NOBIVAC RABIES aimoruk ne’e veternária sira hamutuk ho servisu saúde munisípiu mak sei fó vasina”, dehan Marcos.
Sorin seluk diretór servisu saúde munisípiu Ainaro Benedito Mendonça Santos salienta mós katak, vasina ne’e hanesan meiu prevensaun molok moras raiva tama iha munisípiu refere.
“Aimoruk espesífiku hodi halo tratamentu ba pasiente sira ne’ebé asu tata seidauk iha maibé ministériu saúde kontinua servisu ho parte veternária hodi halo uluk prevensaun ba iha asu haki’ak sira husi meius vasina ida ne’e”, afirma Benedito.
Entertantu, atividade vasina iha munisípiu Ainaro ne’e sei kobre ba to’o iha aldeia atus ida tolunulu resin ida (131) no suku ruanulu resin ida (21) iha munisípiu Ainaro.
*
Hakerek Testu : Ricardo/Castro
Editora : Ana
