MetroFM; Comissão Nacional de Aprovisionamento (CNA) tempu badak sei asina kontratu kona-ba estrada Com, Lautem, Lospalos no Lore munisípiu Lautem.
Ministru Obras Públika (MOP), Samuel Marçal relata iha programa ‘Meet the Press’, iha salaun Maria Gorrete (SEI) tersa feira (30/09/2025) ne’e hateten, estrada liga Lore, Lospalos ba Com tempu badak sei asina ona kontratu.
“Estrada Lore ohin temi ona, ita iha tinan hirak ba kotuk laiha fokus ba infraestruturas tanba ho ita-nia envelope fiskál limitadu, tinan ida ne’e parese asina de’it kontratu ho Lospalos ba Com nomós Com ba mota rua iha ne’ebá, iha ne’e mak ita atu halo, parese tempu badak espera katak komisaun nasionál aprovizoriamentu (CNA) bele prepara kontratu no bele asina ona iha fulan oin mai”, katak MOP Samuel
Samuel Marçal hatutan, labele fó sala ba setór privadu sira, iha parte governu iha ninia sistema burokrasia no Lei dalaruma la’o tarde oituan.
Ministru Obras Públika ne’e argumenta, sistema aprovizoriamentu la’os lalais maibé bele la’o to’o fulan neen nune’e mós bele to’o tinan ida.
“Prosesu tenderizasaun ida ita labele halo de’it fulan rua ka fulan tolu, bele to’o fulan neen, bele to’o fulan hitu, bele to’o fulan ualu, bele to’o tinan ida, ita atu dehan halo nusa, tanba ita iha ona Lei aprovizoriamentu, buat sira ne’e iha ona Lei muda fasil la’ós atu muda lei sira ne’e”, dehan ministru Samuel.
Partisipa iha programa Meet the Press ne’e Ministru Obras Públika (MOP), Samuel Marçal, Sekretáriu Estadu Komunikasaun Sosiál (SEKOMS), Expedito Loro Dias Ximenes, Diretór Jerál Komunikasaun Sosiál Florindo da Costa, Asesór sira, prezidente Tatoli, ip, Prezidenti RTTL,ep, Diretór Nasionál no kargu xefia sira, funsionáriu SEKOMS inklui Média nasionál.
*
Hakerek testu : Luis
Editora : Ana
