MetroFM; Fundasaun Média Dezénvolvimentu Center (FMDC) fó formasaun ba jornalista Rádiu Komunidade Lian Matebean Baucau, nudar esforsu atu hari’i kapasidade jornalista sira iha área reportajen sensível ba jéneru.
Jornalista Lian Matebian Feliciano Soares, hato’o iha programa Metro Ohin Loron tersa feira (02/12/2025) ne’e, katak formasaun ne’e durasaun loron rua hahu hosi Segunda feira to’o tersa feira ne’e no fó formasaun ba oinsa halo publikasaun ne’ebé sensível ba jéneru.
Responsável programa husi FMDC, Teodósia dos Reis, deklara katak objetivu formasaun ne’e mak atu hasa’e koñesimentu jornalista sira, liu-liu parseiru servisu iha rádiu komunidade, kona-ba reportajen sensível ba jéneru no pratika komunikasaun ne’ebé responsavel.
“Jornalista barak iha rádiu seidauk sensível ba jéneru, no dalaruma liafuan ka linguajem mak bele kontinua hakotu habo’ot violénsia iha sosiedade, tanba falta konesimentu klaru kona-ba diferensa entre sexu no jéneru”, Dehan Nia.
Teodósia dos Reis afirma formasaun ne’e mos fó esplikasaun detallu kona-ba Diferensa entre sexu no jéneru oinsa jornalista tenke trata asuntu jéneru ho étika reportajen responsavel nune’e jornalista bele kontribui atu prevene violénsia hodi halo mudansa positivu iha komunidade
Responsavel ne’e akresenta katak média iha papel boot iha mudansa sosiál, Jornalista la’ós de’it atu informa, maibé jornalista mos tenke transforma tanba mensajen sira ne’ebé sai husi média bele muda atitude komunidade. (Erny/Feliciano)
