METROFM/RKSB ; Foinsa’e suku Bucoli, postu administrativu Baucau Vila, munisípiu Baucau inisia hodi harii paz liuhusi servisu sosiál iha suku refere.
Xefe juventude suku Bucoli Samuel Fátima Ribeiro hateten, suku iha inisiativa halibur joven sira atu halo servisu sosiál sira hanesan hadi’a komunidade sira nia uma ne’ebé aat.
“Atividade ne’ebé ami halo iha ne’e mak tulun ema sira liuhusi servisu sira ne’ebé ami halo komunidade nia uma aat, ami buka malu tulun hodi halo servisu privadu balun ne’ebé ami bele halo no ami halo komunidade sira mós kontente ho ami-nia prezensa ami iha planu hodi tulun tan komunidade seluk iha suku ne’e maka presiza ami-nia tulun”, dehan xefe juventude Bucoli Samuel Fátima Ribeiro ne’ebé halo entrevista ho jornalista rádiu komunidade Sahe Bucoli Jally Silva Segunda feira (25/08/2025).
Tuir xefe juventude ne’e mós katak ho mudansa ba hahalok juventude sira nian hodi kria paz iha suku Bucoli hodi kontribui ba dezenvolvimentu nasionál.
“Ha’u husu nafatin ba joven sira hotu kria paz no ami iha kooperasaun di’ak ho xefe suku, husu nafatin ba joven sira la’ós ona tempu atu halo problema husu atu kria paz hodi aselera dezenvolvimentu iha ita nia rai”, afirma Samuel.
Entertantu juventude Bucoli liuhusi xefe juventude sei mobiliza juventude Bucoli hodi vizita saudozu Sahe nia fatin mate iha Same munisípiu Manufahi inklui ho saudozu sira seluk.
*
Hakerek testu : Elidio/Jally
editora : Ana
