MetroFM-Díli: Sekretáriu Estadu Komunikasaun Sosiál (SEKOMS) Expedito “Loro” Dias Ximenes, nu’udar inspetór ba serimónia hasa’e bandeira segunda feira (07/07/2025) ne’e, husu ba funsionáriu sira tenke tau as dever iha servisu fatin no labele tau as interese privadu.
“Oras ne’e dadaun ita la’o hela iha era informasaun iha média sosiál ne’ebé la’o ho plataforma oin-oin, hanesan funsionáriu públiku konserteza ita iha dever no iha direitu, dalabarak ita haluha tiha ita-nia dever no tau as liu ita-nia direitu, ita tenke halo balansu ita-nia dever ho ita nia direitu, atu halo saida, atu nune’e ita bele presta ita-nia atendimentu ba públiku ho di’ak, katak Sektretáriu Estadu SEKOMS, iha Palácio do Governo.
Governante ne’e hatutan, hanesan funsionáriu públiku tenke hakruk ba iha regra no lei sira ne’ebé determina ona iha funsaun públika hanesan administrasaun públika nia laran.
Entretantu partisipa iha serimónia hasa’e bandeira nasionál mak hanesan, Vise Ministru Asuntu Parlamentár Adérito Hugo da Costa, Prezidente Funsaun Públika Agostinho Letêncio de Deus no komisáriu sira Funsaun Públika, Prezidente Centro Nasionál Chega Hugo Maria Fernandes, Diretór Ezekutivu Arkivu no Muzeu Rezisténsia Timor Leste, Jorge Alves “We moris”, Falintil Forsa Defeza Timor Leste (F-FDTL) no Polisia Nasionál Timor Leste (PNTL), inklui funsionáriu públiku no ajente administrasaun públiku sira husi gabinete primeiru ministru no ministériu sira ne’ebé tutela iha prezidensia konsellu ministru.
*
Hakerek Nain : Luis
Editor : Ana
