MetroFM; Governu liuhusi sorumutu konsellu ministru (KM) hala’o iha Palásiu Governu, Dili, kuarta feira (22/10/2025) ne’e desidi projetu Rezolusaun Governu kona-ba konsagrasaun loron 5 fulan-juñu nu’udar Loron Nasionál Tasi, ne’ebé aprezenta husi Primeiru-Ministru Kay Rala Xanana Gusmão hetan aprovasaun, ne’ebé dedika hodi selebra no prezerva tasi no biodiversidade tasi iha Timor-Leste, nomós hala’o atividade sira ho objetivu atu promove nia valór no promove partisipasaun ativa sosiedade nian, liuliu labarik no foin-sa’e sira, iha ninia protesaun.
Konsagrasaun ba data ida-ne’e reflete rekoñesimentu ba importánsia tasi ba ekilíbriu ambientál, sustentu ba komunidade no dezenvolvimentu sustentável nasaun nian, nune’e mós kompromisu Governu hodi konserva rekursu tasi no implementa Polítika no Planu Asaun ba Promosaun Ekonomia Marítima ida ne’ebé Reziliente no Sustentável 2025-2035.
Rezolusaun Governu ne’e estabelese mós katak selebrasaun Loron Nasionál Tasi sei hala’o tinan-tinan, ho rejime rotasaun, entre kada munisípiu no rejiaun iha país ne’e, ho envolvimentu hosi komunidade, autoridade rejionál no munisipál sira, lideransa komunitária sira, organizasaun sosiedade sivíl sira, setór privadu, no sidadaun tomak, hodi reforsa valór kulturál no espirituál tasi nian ba povu timoroan no kompromisu nasionál ba prezervasaun tasi.
*
Fontes ba informasaun ne’e husi Portal Governu : Sorumutu Konsellu Ministrus loron 22 fulan-outubru tinan 2025
