MetroFM; Governu konstrui irigasaun ba natar komunidade iha suku Mau-Nuno, postu administrativu Ainaro, munisípiu Ainaro hodi fó biban ba sira kuda hare no irigasaun ne’e benefisia natar hamutuk ektare atus ida ruanulu (120), enkuantu natar hirak ne’e komunidade agrikultór sira abandona tinan sanulu ona.
Liuhusi rádiu komunidade Tatamailau Ainaro, kinta feira (02/10/2025) ne’e, ba rádiu MetroFM, Xefe suku Mau-Nuno Valente Ramos hateten, to’os na’in sira durante tinan sanulu labele halo natar nune’e irigasaun ne’e inportante tebes ba komunidade hirak ne’e.
“Agora daudauk ne’e tanba ita-nia komunidade durante tinan sanulu ne’e ita-nia to’os na’in sira ne’e abandona tiha ona natar ne’e, ita-nia ministériu agrikultura hatama programa ne’e ba iha programa PDIM no halo mós talang hodi bele kanaliza bee ba natar hirak ne’e”, hateten xefe suku Mau-Nuno.
Tékniku Programa Dezenvolvimentu Integradu Munisipál (PDIM)-Ainaro Francisco Xavier dehan, hahú husi inísiu projetu ne’e konstrui la’o ho di’ak bele fasilita komunidade sira bele halo fila-fali natar no sei haree hodi garantia nia kualidade.
“Tuir tempu servisu ne’ebé mak iha kompañia sei termina nia obra ne’e iha fulan marsu 2026 servisu ne’e susar oitoan iha erozaun ka rai halai ne’e tanba ne’e kompañia halo mós talang hodi bele kanaliza bee ho di’ak no ami kontinua observa hodi garantia nia kualidade”, dehan tékniku Francisco.
Konstrusaun irigasaun ho distánsia kilómetru tolu responsabiliza husi kompañia Lesugatal unipesoal limitada ho nia durasaun tempu hahú husi fulan marsu 2025 sei remata iha fulan marsu 2026, servisu ne’ebé kompañia ne’e halo irigasaun ho sistema uza talang inklui rehabilita kanu irigasaun ne’ebé aat.
Enkuantu supervizór kompañia Lesugatal Leonito Bianco afirma, halo servisu iha fatin risku garantia sei hala’o ho di’ak no determina tuir tempu ne’ebé governu fó.
“Irigasaun ne’e susar oituan iha parte metru haatnulu ne’e sei uza paralon no talang hodi bele kanaliza bee mai ho di’ak maibé ami sei garantia irigasaun ne’e hotu tuir tempu no kualidade”, katak Leonito.
Entertantu, irigasaun kotu totál impaktu husi erozaun iha tinan hirak liu-bá tanba ne’e governu liuhusi PDIM konstrui fila-fali irigasaun ne’e ba komunidade iha suku refere, no orsamentu ne’ebé aloka ba irigasaun ne’e hamutuk dolar rihun atus ida sanulu resin hitu atus haat haatnulu resin lima sentavu ualu nulu ($ 117,445,80).
*
Hakerek testu : Deo & Elidio
Editora : Ana
