Dili, 27 de Maiu 2025 – Ministru Justisa, Sergio Hornai hateten Governu halo esforsu oin-oin iha nivél nasionál no parseria internasionál sira, buka esforsu makaas atu hametin instituisaun estadu sira, espesialmente orgaun importante hanesan Komisaun Anti Korupsaun (CAC) hodi prevene no kombate korupsaun iha Timor-Leste.
Sergio Hornai hato’o komitmentu Governu da IX ne’e iha abertura ba diskusaun rekomendasaun Nasoens Unidas ba Prevensaun no kombate korupsaun, tersa feira ne’e iha salaun MNEC Praia dos Coqueiros Dili.
Governante ne’e haktuir razaun fundamentál hametin CAC tanba Timor – Leste estadu parte organizasaun sira nasaun unidas nian, ne’ebe presiza serbisu hamutuk liu-liu medida sira atu prevene no kombate korupsaun.
“Governu da sia mai hosi governu ida iha ninia prontidaun apoiu setor justisa tomak iha Timor – Leste, objetivu prinsipal hosi governu no estadu ninian mak atu bele buka hametin estadu direitu, estadu ida demokrátiku, estadu ida ne’ebé respeitu ba direitus humanus no mos halo justisa ida lolos no tebes duni ba sidadaun sira.” hateten Governante ne’e.
Tuir Governante ne’e, governu nia programa liu-liu governu dasia konstitusional ninian, medida atu bele hametin ba iha setór justisa liu-liu oinsá mak atu hametin estadu ida ne’e bele hatur duni iha estadu ne’ebé estadu direitu nomós halo kumprimentu ba iha legalidade, buka esforsu atu rekoñese dezenvolvimentu setór sira ne’ebé ezisti tiha ona, liu liu servisu sira ne’ebé apoiu ba iha orgaun autoridade judisiáriu sira, atu hametin koezaun ka misaun estadu direitu no estadu demokrátiku.
Durante diskusaun sei haree ba diskusaun no revizaun implementasaun konvensaun Nasoens Unidas Kontra Korupsaun no rekoperasaun ativu, diskusaun ne’e sei hala’o durante loron haat hahu 27-30 de Maiu 2025.
Iha abertura diskusaun ne’e hetan partisipasaun husi Prezidenti Tribunal Rekursu Afonso Carmona, Komisariu Komisaun Anti Korupsaun Rui Pereira dos Santos, korpu diplomátiku sira, setór privadu sira inklui Pontu fokál CAC husi ministeriu sira.
Hakerek : Luis
Hadia : Ana
