MetroFm; Governu Timor Leste liuhusi Ministeriu Komérsiu no Industria (MCI sigla portugés) kinta feira (28/08/2025) ne’e, hala’o atividade expo ho tema “oportunidade networking no esperiénsia kulturál hodi enkoraja koneksaun globál” iha sentru konvensaun Díli hodi komemora loron Konsulta Populár, ofisialmente loke husi primeiru ministru Kay Rala Xanana Gusmão.
Ministru Komérsiu no Industria Nino Pereira hateten, intensaun husi expo internasionál dahuluk ne’e, atu konekta emprezariu timoroan no emprezariu internasionál hodi promove produtu Timor ba merkadu internasionál.
“Atu konekta ita-nia emprezariu sira rai laran no emprezariu sira mai husi rai liur hatudu katak ita mós iha produtu, ita mós hakarak atu aprende se wanhira ita aprende ho esperiénsia ida ne’ebé mak iha liuhusi ita-nia produsaun ne’ebé mak sei ki’ik no ita-nia kualidade produsaun mak seidauk di’ak, liuhusi feira ne’e ita bele hetan esperiénsia no aplika fali iha ita-nia rai”, dehan ministru MCI.
Nino Pereira mós esplika liután empreza nasionál no internasionál lori sira-nia produtu mai hatudu no halo mós promosaun ba sira-nia produtu.
Sorin seluk jestora empreza nasionál Café Atsabe Crisia da Conceição mós senti kontente, tanba liuhusi expo ne’e bele hatudu ona sira-nia produtu Café Atsabe ba mundu internasionál.
“Atividade feira ne’e ha’u aprende buat barak motiva tan ami oinsá atu bele produs produtu lokál ba fa’an fali iha rai liur ho kuantidade boot no kualidade, ami agora kontinua loke ami-nia fatin ba fa’an produtu no kontinua sai hanesan emprezariu timoroan no gosta tebes atu kompete iha merkadu internasionál”, relata Crisia.
Partisipa husi atividade ne’e mai husi empreza nasionál ne’ebé partisipa iha expo ne’e hamutuk atus ida limanulu resin hitu (157) no empreza internasionál sianulu resin tolu (93) no atividade ne’e hala’o durante loron lima hahú loron 28 fulan agostu to’o loron 1 fulan setembru tinan 2025.
*
Hakerek testu : Vasco
Editora : Ana
