RCLM-MetroFM; Klibur Defisiénsia Tilun Timor Leste (KDTTL) komemora Loron Internasionál Jestuál Tilun iha munisípiu Baucau, tersa feira (23/09/2025) ne’e.
Prezidente Konsellu ba Asosiasaun Defisiénsia Timor-Leste (ADTL) no Prezidente Ezekutivu Klibur Defisiénsia Tilun Timor Leste (KDT-TL), ba rádiu komunidade Lian Matebian Baucau mai rádiu MetroFM iha programa ‘Metro Loron Ohin’ Crecência Madeira de Deus hateten, mundu tomak komemora lian jestuál inklui Timor Leste, tanba lian jestuál importante tebes ba ema ho defisiénsia tilun bele hatene informasaun.
“Ohin mundu tomak selebra lian jestuál inklui mós Timor Leste, katak lian jestuál ne’e importante tebes ba ema ho defisienti tilun, sira ne’ebé mak seidauk asesu ba informasaun liuhusi lian jestuál ema defisienti sira bele asesu ona informasaun sira hanesan edukasaun, saúde no inkluzaun sosiál”, katak Prezidente Ezekutivu KDT-TL.
Prezidente Ezekutivu ne’e hatutan, to’o ohin loron ema ho defisiénsia tilun seidauk servisu iha parte governu, tanba laiha tradutór ba lian jestuál.
“To’o ohin loron ema defisiente tilun iha Timor Leste seidauk asesu servisu ba instituisaun governu sira, tanba seidauk iha tradutór lian jestuál, tanba ida ne’e mak sai barreira ba ema ho defisiente tilun sira”, tenik Nia
Prezidente ezekutivu ne’e nia parte konsidera ema ho defisiénsia tilun no matan asesu ona edukasaun maibé to’o ohin loron sira seidauk hetan servisu iha instituisaun governu, ida ne’e hanesan diskriminasaun ba ema ho defisiénsia sira, tanba sira sai vulnerável tebes ba dezenvolvimentu Timor Leste.
*
Hakerek testu : Luis
Editora : Ana
