MetroFM; Reuniaun konsellu minstru kuarta feira (09/07/2025) ne’e, aprova ona Kriasaun Institutu Politékniku Timor-Leste (IPTL).
Tuir komunikadu imprensa rádiu MetroFM asesu, Konsellu Ministru hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta hosi Ministru Ensinu Superiór, Siénsia no Kultura, José Honório da Costa Pereira Jerónimo, ba Kriasaun Institutu Politékniku Timor-Leste.
Institutu Politékniku Timor-Leste, ne’ebé habadak ho naran IPTL, hodi troka atuál Institutu Politékniku Betano, hodi fó karater nasionál ba estabelesimentu ensinu superiór foun ne’e.
Órgaun sira ein-ezersísiu, rekursu umanu dosente no la dosente no patrimóniu Institutu Politékniku Betano nian nafatin la altera, atu nune’e bele garante kontinuidade institusionál no funsionamentu eskola superiór sira ne’ebé funsiona dezde tinan 2017, sein prejuizu ba kriasaun unidade orgánika foun.
IPTL sei iha sede iha Betano, no ninia jestaun administrativa no akadémika bele inklui eskola superior sira iha munisípiu sira seluk.
Kondisaun adekuadu sira iha ona hodi garante dezlokasaun hosi órgaun kompetente sira, hodi asegura jestaun ida ne’ebé efisiente ba ensinu superiór tékniku.
Diploma ne’e mós determina katak Institutu foun ne’e mantein akreditasaun institusionál ba tinan lima ne’ebé fó husi Ajénsia Nasionál ba Avaliasaun no Akreditasaun Akadémika, I.P. (ANAAA) ba Institutu Politékniku Betano, tuir termu Diploma Ministeriál nu. 11/2023, loron 19 fulan-abríl, lahó nesesidade atu adota rejime instalasaun ka períodu tranzitóriu ida.
* fontes ba informasaun ne’e hosi Portal Governu : Sorumutu Konsellu Ministrus nian iha loron 9 fulan-jullu tinan 2025
