MetroFM; Konsellu Ministru (KM) hala’o sorumutu iha Palásiu Governu, Dili, kuarta feira (08/04/2026) ne’e, aprova projetu arkitetóniku ba Sentru Konvensaun Dili foun, hafoin análize ba proposta modelu arkitetóniku ne’ebé aprezenta hosi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay.
Projetu estruturante ida-ne’e ho objetivu atu sai uma-na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira nian nomós eventu ho dimensaun boot sira seluk.
Sentru konvensaun foun sei harii iha área portu tuan, iha Baía Díli nia sorin no sei inklui edifísiu prinsipál ida ho sala konferénsia, auditóriu sira no pavillaun sira ba espozisaun nomós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida no sentru entretenimentu no komérsiu ida.
Alén ne’e mós ho proposta husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, KM aprova projetu Rezolusaun Governu ba nomeasaun Duílio Marino Gusmão Araújo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, IP, ne’ebé koñesidu ho naran TradeInvest Timor-Leste.
Nomeasaun ne’e bazeia ba kompeténsia téknika no aptidaun ne’ebé hatudu ona ba kargu ne’e, ba mandatu tinan tolu, iha rejime eskluzividade. Duílio Marino Gusmão Araújo da Silva hala’o knaar nu’udar Diretór Adjuntu iha TradeInvest Timor-Leste dezde tinan 2019, antes ne’e okupa ona kargu sira nu’udar Diretór Promosaun Esportasaun, Jerente Promosaun Esportasaun, no mós Jerente Relasaun Esterna no Marketing. *
Fontes ba informasaun husi : Portal Governu Timor-Leste
