MetroFM; Sorumutu Konsellu Ministru (KM) iha Palácio Governo kuarta feira (10/12/2025) ne’e, aprova projetu Rezolusaun Governu, ne’ebé aprezenta husi Sekretáriu Estadu Arte no Kultura (SEAK), Jorge Soares Cristovão, hodi promove utilizasaun tais Timor-Leste nian.

Rezolusaun ida-ne’e ho objetivu atu reforsa valorizasaun ba elementu sentrál ida-ne’e hosi identidade kulturál imateriál timoroan nian, ne’ebé rekoñese hosi UNESCO no iha abut ne’ebé metin iha rituál komunitáriu sira, nune’e mós iha atividade ekonómika no sosiál nasaun nian.

Diploma ne’e determina katak órgaun no servisu administrasaun públika sira promove uzu tais iha loron servisu dahuluk kada fulan no enkoraja dirijente no xefe sira atu uza vestuáriu ne’e iha aktu ofisiál no serimónia públika sira.

Governu mós apela ba sosiedade sivíl no setór privadu sira atu hamutuk no enkoraja sira-nia funsionáriu sira atu uza tais semana ida dala ida, hodi kontribui ba nia prezervasaun no divulgasaun.

Rezolusaun ne’e prevee mós kriasaun komisaun multidisiplinár ida hodi dezenvolve rejime sertifikasaun no autentisidade ba tais, nune’e mós rekualifikasaun ba Merkadu Tais nian iha Dili, hodi bele valoriza artezanatu sira-nia serbisu no reforsa potensiál kulturál no turístiku espasu ida-ne’e nian. (*)

Fontes informasaun ne’e husi : Portal Governu