MetroFM; Konsellu Ministru (KM) hala’o sorumutu iha Palásiu Governu, Dili, kuarta feira (08/10/2025) ne’e, aprova projetu Rezolusaun Governu nian, ne’ebé aprezenta husi Ministru Prezidénsia Konsellu Ministru, Agio Pereira no Komisaun Funsaun Públika kona-ba formasaun karakter funsionáriu públiku sira nian.

Rezolusaun Governu ida-ne’e ho objetivu atu hametin étika, disiplina, lideransa no sentidu servisu públiku funsionáriu públiku hotu-hotu nian, hodi nune’e bele promove Administrasaun Públika ida ne’ebé ho integridade, efisiénsia no kompromisu boot liu ba valór sira Estadu nian.

Medida ne’e nu’udar parte husi reforma ne’ebé la’o daudaun iha jestaun no dezenvolvimentu rekursu umanu ne’ebé prevee ona iha Programa Governu Konstitusionál da-9 nian, ne’ebé destaka importánsia formasaun nian nu’udar instrumentu esensiál atu hametin lideransa, transparénsia no responsabilizasaun iha setór públiku.

Formasaun ne’e kontinua no sei kobre komponente karakter, ierarkia no disiplina, sidadania, patriotizmu no nasionalizmu nian, hodi haburas kultura respeitu institusionál, kumprimentu ba norma legál sira, nomós valorizasaun ba kna’ar funsionáriu públiku nian iha konstrusaun Estadu no dezenvolvimentu nasionál. Sei inklui mós módulu kona-ba abilidade profisionál sira, hanesan jestaun efisiente, serbisu iha ekipa no rezolve dezafiu no konflitu sira iha servisu públiku, nomós área relevante sira seluk.

Komisaun Funsaun Públika sei responsabiliza ba koordenasaun dezenvolvimentu kurríkulu no servisu hamutuk ho instituisaun relevante sira hodi determina fatin no kondisaun ba realizasaun formasaun.

Partisipasaun husi funsionáriu sira iha atividade sira-ne’e nu’udar komplementu obrigatóriu ida ba rejime formasaun no dezenvolvimentu profisionál ne’ebé daudaun ne’e vigora.

*

Fontes ba informasaun ne’e husi Portal Governu : Sorumutu Konsellu Ministrus loron 8 fulan-outubru tinan 2025