MetroFM; Konsellu Ministru (KM) hala’o sorumutu iha Palásiu Governu, Dili, kuarta feira (08/10/2025) ne’e, aprova projetu Rezolusaun Governu nian, ne’ebé aprezenta husi Primeiru-Ministru, Kay Rala Xanana Gusmão, ne’ebé nomeia membru foun Konsellu Administrasaun Fundu Espesiál Dezenvolvimentu nian ba Rejiaun Administrativa Espesiál Oecusse Ambeno (RAEOA).
Rezolusaun Governu nian ida-ne’e, Régio Servantes Romeia da Cruz Salu hetan nomeasaun, to’o 31 fulan-dezembru 2025, ba kargu Prezidente Konsellu Administrasaun hosi Fundu refere, Herculano Sousa no Amâncio Aguido Punef ba kargu vogál husi Konsellu hanesan.
Fundu Espesiál Dezenvolvimentu ba Rejiaun Administrativa Espesiál Oecusse Ambeno kria husi Dekretu-Lei n. 1/2015, loron 14 fulan-janeiru, ho objetivu atu finansia projetu ne’ebé promove dezenvolvimentu ekonómiku no sosiál rejiaun nian, hodi asegura jestaun ida ne’ebé efisiente, seguru no transparente ba rekursu ne’ebé aloka ba ninia implementasaun.
Alén ne’e, sorumutu KM mós deside hodi aprova lema “Que a celebração destes 50 anos, do passado, nos assegure confiança no presente e esperança no futuro!” (“Atu selebrasaun tinan 50, pasadu nian ne’e, fó mai ita konfiansa iha tempu prezente no esperansa ba tempu futuru!”) ba Komemorasaun Aniversáriu Proklamasaun Unilaterál Independénsia Repúblika Demokrátika Timor-Leste nian ba dala 50, ne’ebé akontese iha 28 Novembru tinan 1975.
*
Fontes ba informasaun ne’e husi Portal Governu : Sorumutu Konsellu Ministrus loron 8 fulan-outubru tinan 2025
