MetroFM; Sorumutu Konsellu Ministru (KM) kuarta feira (10/12/2025) ne’e, iha Palácio Governo aprova projetu Rezolusaun Governu nian, ne’ebé hanaruk, to’o loron 30 fulan-juñu tinan 2026, períodu vijénsia suspensaun ba ensinu, aprendizajen no prátika arte marsiál sira no taka temporáriu ba fatin no instalasaun hotu-hotu ne’ebe destinadu ba ensinu, aprendizajen no prátika arte marsiál sira.
Desizaun ne’e fó kontinuasaun ba Rezolusaun Governu n. 45/2023, loron 10 fulan-novembru, ne’ebé mak extende ona tuituir malu hosi Rezolusaun Governu n. 17/2024, loron 24 fulan-abríl, n. 60/2024, loron 7 fulan-novembru, no n. 22/2025, loron 7 fulan-abríl.
Presupostu sira ne’ebé justifika suspensaun ne’e vigora nafatin, liuliu nesesidade atu hametin dame sosiál ne’ebé hetan ona dezde fulan-novembru 2023 no atu garante katak prátika arte marsiál sira sei bele halo de’it iha kontestu desportivu, hodi kontribui ba formasaun sívika no umanista ba joven sira.
Governu Konstitusionál IX foin lalais ne’e konklui prosedimentu lejizlativu hodi submete ba Parlamentu Nasionál proposta lei ida ne’ebé sei estabelese rejime jurídiku foun ba prátika arte marsiál sira.
To’o nia aprovasaun no tama iha vigór, nafatin nesesáriu kontinuasaun ba suspensaun no enserramentu temporáriu ba fatin sira ne’ebé destinadu ba ensinu, aprendizajen no prátika arte marsiál sira. (*)
Fontes ba informasaun ne’e husi : Portal Governu
