MetroFM; Konsellu Ministru (KM) hala’o sorumutu iha Palásiu Governu, Dili, kuarta feira (22/10/2025) ne’e, delibera hodi autoriza Ministru Transporte no Komunikasaun, Miguel Marques Gonçalves Manetelu, asina Memorandu Entendimentu ida entre Governu Repúblika Demokrátika Timor-Leste no Governu Malázia kona-ba kooperasaun iha ámbitu telekomunikasaun sira.

Memorandu Entendimentu ne’e ho objetivu atu hametin kooperasaun bilaterál iha setór telekomunikasoins, ne’ebé kobre infraestrutura, servisu no asunturegulatóriu sira, bazeia ba resiprosidade no benefísiu mútuu.

Entre área prinsipál sira kooperasaun nian mak interkámbiu koñesimentu tékniku no prátika di’ak, kapasitasaun institusionál, promosaun peskiza no inovasaun teknolójika, nomós fasilitasaun parseria entre entidade reguladora, operadór no ajente sira setór ne’e nian hosi nasaun rua ne’e.

Akordu ne’e mós prevee programa formasaun, workshop no interkámbiu tékniku, hodi kontribui ba dezenvolvimentu setór telekomunikasaun sira ne’ebé modernu, seguru no efisiente liu, ne’ebé esensiál ba progresu ekonómiku no prosesu integrasaun rejionál Timor-Leste nian iha espasu ASEAN.

Fontes ba informasaun ne’e husi Portal Goveru : Sorumutu Konsellu Ministrus loron 22 fulan-outubru tinan 2025