MetroFM; Konsellu Ministru (KM) hala’o sorumutu iha Palásiu Governu, Dili, kuarta feira (08/10/2025) ne’e, deside hodi autoriza asinatura Memorandu Entendimentu ida entre Governu Malázia no Repúblika Demokrátika Timor-Leste ba kooperasaun iha ámbitu informasaun no dezenvolvimentu média.

Memorandu ne’e sei asina husi Sekretáriu Estadu Komunikasaun Sosiál, Expedito Dias Ximenes no Ministru Komunikasaun Malázia nian, Ahmad Fahmi bin Mohamed Fadzil durante Simeira ASEAN (The Association of Southeast Asian Nations) tuir mai, ne’ebé sei hala’o iha loron 24 to’o 26 fulan outubru tinan ne’e iha Kuala Lumpur, Malázia.

Akordu ne’e ho objetivu atu hametin kooperasaun bilaterál entre nasaun rua ne’e iha área informasaun no komunikasaun sosiál, hodi promove troka esperiénsia, dezenvolvimentu kapasidade téknika no inovasaun dijitál iha setór ne’e.

Entre área sira kooperasaun nian ne’ebé prevee ona, tuirmai destaka transformasaun dijitál no inovasaun iha setór informasaun no média nian, partilla polítika informasaun no prátika regulatóriu sira, troka no fahe notísia no konteúdu informativu, kolaborasaun iha radiodifuzaun no teknolojia televiziva nian, formasaun no dezenvolvimentu rekursu umanu, nomós promosaun kooperasaun iha área produsaun filme no dokumentáriu nian.

*

Fontes ba informasaun ne’e husi Portal Governu : Sorumutu Konsellu Ministrus loron 8 fulan-outubru tinan 2025