MetroFM/RKA ; Komunidade munisípiu Ainaro susesu komemora loron FALINTIL ba dala limanulu (50) iha munisípiu ne’e.
Prezidente Autoridade Munisípiu Ainaro Manuela Georgina Carmo Bucar Corte-Real hateten, komemorasaun ne’e hodi fó omenajen ba eroi sira ne’ebé fó sira-nia isin hodi sosa liberdade.
“Selebrasaun ne’e envolve estudante, komunidade, veteranu no funsionáriu barak tebetebes hodi komemora loron ne’e, ita mós ba vizita osuáriu fó omenajen no onra ba ita-nia eroi da pátria sira, durante ne’e sira fó sira-nia vida ba ita, ohin ita goja hanesan nasaun ida importante husi kari aifunan ne’e hodi hamoris nafatin espíritu no domin ba ita-nia mártires sira”, dehan PAM Ainaro iha loron tersa feira (19/08/2025).
Iha selebrasaun ne’e veteranu Sebastião Castro Perreira kódigo kaka tua, husu ba ukun na’in sira iha tinan-tinan tenke selebra loron istóriku sira atu nune’e haforsa nafatin istória luta nian ba foinsa’e sira.
“Hanesan veteranus ha’u kontente tebes ohin bele halo tinan limanulu hodi hanoin hikas rezisténsia FALINTIL sira nian realidade ne’ebé mak iha, hanesan veteranus orgullu tebes ita labele haluha ida ne’e hanesan veteranus hanesan mós Ainaro oan sente onradu tebes kada tinan keta haluha kontinua komemora nafatin loron FALINTIL ne’e, hanesan eis FALINTIL ida ha’u fó mensajen nafatin ba jerasaun foun sira iha FALINTIL atu defende nafatin soberania ida ne’e”, hateten veteranu Sebastião.
Enkuantu iha selebrasaun ne’e lidera husi Falintil Forsa Defeza de Timor Leste (F-FDTL), partisipa husi komunidade munisípiu Ainaro, veteranu sira, liña Ministeriál sira, funsionáriu inklui estudante no Polísia Nasionál Timor Leste (PNTL) munisípiu refere.
*
Hakerek testu : Ricardo/Elidio
Editora : Ana
