Lospalos/MetroFM; Kondisaun aula eskola Ensinu Báziku Filial ( EBF) 1 no 2 Assalaino suku Fuiloro postu administrativu Lospalos, munisípiu Lautem seidauk hetan rehabilitasaun husi governu to’o ohin loron, tanba eskola refere nia kondisaun grave tebes no difikulta ba estudante sira-nia prosesu aprendijazen wainhira iha tempu udan liu-liu tempu anin fó ameasadu ba estudante sira-nia vida.
Tuir reportajen jornalista rádiu komunidade Lospalos Nito Soares, ba rádiu MetroFM segunda feira (14/07/2025) ne’e, estudante EBF Assalaino Festisia Moniz Xavier, husu ba Ministériu Edukasaun atu hadi’a sira-nia eskola, tanba daudaun ne’e kondisaun eskola refere la seguru ba estudante sira atu tuir prosesu aprendijazen.
“Ha’u husu ba Ministériu Edukasaun atu hadi’a ami-nia eskola, tanba daudaun ne’e kondisaun eskola la seguru ba ami atu tuir prosesu aprendijazen, tanba wainhira tempu udan monu rai liu-liu tempu anin fó risku ba ami-nia vida tanba kakuluk eskola hahú dodok ona”, hateten Festisia Moniz Xavier
Iha fatin hanesan kordenadór EBF Assalaino Luciano dos Santos mós afirma, kondisaun eskola ameasadu tebes ba estudante sira-nia vida wainhira iha tempu anin, tanba eskola kakuluk hahú dodok liu-liu iha tempu udan no difikulta tebes ba prosesu aprendijazen no sala-de-aula mós la sufisiente ba estudante sira.
“Kondisaun eskola ameasadu tebes ba estudante sira-nia vida wainhira iha tempu anin, tanba eskola kakuluk hahú dodok liu-liu iha tempu udan no difikulta tebes ba prosesu aprendijazen no sala-de-aula mós la sufisiente ba estudante sira tanba agora daudaun iha de’it sala tolu nune’e fahe estudante sira ba turnu rua, hodi tuir prosesu aprendijazen, tanba ita konta timor ukun-an no tinan ruanulu resin ona eskola refere aat to’o ohin loron maibé, governu Timor Leste la tau matan maske parte eskola hato’o beibeik problema eskola nian ba servisu edukasaun munisipál Lautem laiha resposta”, afirma Luciano.
Kordenadór EBF Assalaino ne’e mós dehan, iha eskola ne’e fasilidade sanitária la seguru ba estudante sira wainhira atu asesu ba bee moos.
“Iha eskola ne’e fasilidade sanitária la seguru ba estudante sira wainhira atu asesu ba bee moos hodi fasilita estudante no profesór sira wainhira asesu ba haris fatin, tanba ne’e obrigado tenke hola bee husi komunidade ne’ebé besik área eskola nian hodi enxe ba tanki haris fatin nian”, dehan Luciano dos Santos.
Hatan ba preokupasaun ne’e diretór servisu edukasaun munisipál Lautem, Anibal Fernandes mós relata katak, problema eskola EBF Assalaino, ne’e parte Edukasaun Munisipál hatama ona ba lista emerjénsia no relata ona ba Ministériu Edukasaun hodi hein prosesu.
‘’Problema eskola EBF Assalaino, ne’e parte Edukasaun Munisipál hatama ona ba lista emerjénsia no relata ona ba Ministériu Edukasaun hodi hein nia prosesu tuir mai”, relata diretór Anibal Fernandes.
Entretantu totál estudante iha EBF Assalaino ne’e hamutuk ema na’in atus ida limanulu resin lima (155) no profesór hamutuk ema na’in hitu (7) inklui kordenadór.
*
Hakerek testu: Elidio & Nito Soares
Editora : Ana
