MS SELEBRA LORON NASIONÁL SAÚDE DALA 10 IHA TL

VPM, Ministru Koordenadór Asuntu Sosiál no MDRHC Mariano ‘Assanami’ Sabino, Ministra MSSI Verónica das Dores hamutuk ho bainaka Nasionál no Internasionál baku babadok nu’udar simbolu hodi komemora Loron Nasionál Saúde ba dala 10 (22/07/2025)

MetroFM; “Lori Saúde Hakbesik Ba Komunidade Hodi Haforsa Prevensaun” hanesan tema nasionál ba selebrasaun Loron Nasionál Saúde ba dala sanulu (10) ne’ebé organiza hosi Ministériu Saúde (MS) iha jardin B.J. Habibie, tersa feira (22/07/2025) ne’e.

Iha selebrasaun ne’e Vise Primeiru Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitáriu (MDRHC sigla Português) Mariano ‘Assanami’ Sabino hateten, dedikasaun profisionál saúde importante tebes durante ne’e, hahú iha tinan 1999 to’o ohin loron iha mudansa pozitivu, liu-liu ba atendementu povu no nasaun Timor Leste.

“Tanba ne’e mak dedikasaun iha situasaun difisil, mantein servisu to’o ohin loron, foin tinan 10 maibé imi-nia didikasaun ne’ebé eziste, hahú kedas ita seidauk restaura independénsia, ne’e mak dedikasaun ne’ebé estraordináriu no saida mak ita atinji ona, saida mak ita presiza ita atu atinji”, hateten Vise PM.

Iha biban ne’e Vise Ministru Saúde ba Operasionalizasaun Ospitál Flávio Brandão Mendes de Araújo kongratula no fó agradese ba parseiru sira ne’ebé fó ona kontribuisaun ba servisu saúde nian iha Timor Leste.

“Lori Ministra Saúde nia naran hakarak fó agradese no kongratula esforsu tomak mak ita idaidak kontribui, ba ita-nia investe enerjia ba servisu saúde to’o ohin loron ba dala sanulu, ita hotu sei lembra katak iha tinan sanulu liubá, foin primeira vez iha ita-nia rai hala’o programa saúde integradu lori saúde ba komunidade hodi haforsa prevensaun”, relata Vise Flávio.

Partisipa iha komemorasaun Loron Saúde Nasionál ne’e, Ministra Solidariedade Sosiál no Inkluzaun (MSSI) Verónica das Dores, Vise Primeiru Ministru Mariano ‘Assanami’ Sabino, reprezentante Autoridade Munisipál Díli, reprezentante Organizasaun Mundiál Saúde (OMS) iha Timor Leste, parseiru Nasionál no Internasionál sira, inklui estudante saúde públika husi universidade sira hanesan Universidade Oriental Timor Lorosa’e (UNITAL), Universidade Nacional Timor Lorosa’e (UNTL), Instituto Superior Cristal (ISC) no Instituto Ciências da Saúde (ICS).

Hakerek testu : Vasco/Job

Editora : Ana