Rádiu Metro FM nu’udár estasaun rádiu ne’ebe mak parte ida husi diresaun Centro Radio Comunidade no estabelese tiha ona iha loron 1 fulan Agostu tinan 2014, iha ne’ebé hetan lansamentu husi Sekretariu Estadu ba Komunikasaun Sosial, iha VI Governu Konstitusional. Husi kedas inisiu estasaun rádiu ne’e hetan atribuisaun lisensa frekuensia 94.7 Mhz husi Autoridade Nacional de Comunicações (ANC).
Metro FM sai nuudar estasaun rádiu ne’ebe lokaliza no funsiona iha kapital Dili, espesífikamente iha Avenida Bispo de Medeiros, Kintal Boot Dili ho funsaun nudar rádiu laboratóriu ba rádiu komunidade sira, nune’e mos fasilita formandu husi sentru formasaun no estudante universitariu sira iha area komunikasaun sosial sira atu bele hetan koiñesimentu klean liu tan liu husi prátika sira iha produsaun programa rádiu no oinsa sai aprezentador no aprezentadora ne’ebe mak diak iha estasaun rádiu.
Funsaun seluk husi rádiu Metro FM mos sai nudar estasaun rádiu ne’ebe mak bele fasilita liña ministériu sira ne’ebe mak atu divulga informasaun hotu ne’ebe mak ligadu ba serbisu ministériu sira nian hodi transmiti liu husi transmisaun direta iha studio Rádiu Metro FM no liu husi gravasaun iha Rádiu Metro FM no rezultadu gravasaun ho transmisaun direta sira halo pakotajen no distribui ba rádiu komunidade sira hodi transmiti mos tuir frekuensia rádiu komunidade ida-idak nian.
Liu husi Metro FM, fasilita mos assuntu sira ne’ebe mak ligadu ba assuntu Parlamentu Nasional nune’e mos ajensia sira ka sosiedade sivil sira ne’ebe mak serbisu parseria ho governu ba assuntu governasaun diak, anti korupsaun, demokrasia, assuntu humanitaria no assuntu seluk ne’ebe prinsipal ba moris diak povu nian.
Tinan 2025 serbisu Metro FM sai nuudar atividade ida ne’ebe mak iha Diresaun Nasional ba Dezenvolvimentu Mídia ho baze Dekretu Lei Nu. Dekretu-Lei Nú. 5/2025, loron 5 fulan-Fevereiru no Diploma Ministerial Nu. 3/2025, loron 19 fulan Fevereiru iha ne’ebe atribui serbisu ba Diresaun DNDM, Departementu Apoiu Rádiu Komunidade, tuir Diploma Ministerial artigu 220 pontu d “Jere rádiu Metro FM, hanesan laboratóriu formasaun prátika ba membru Rádiu Komunidade sira no produsaun konteúdu ba sira”
