MetroFM; Polísia Nasionál Timor-Leste (PNTL), garante seguransa ba jogu futeból Comunidade dos Países de Língua Portuguesa (CPLP), ne’ebé sei realiza iha Timor Leste.
Iha entrevista ho jornalista rádiu MetroFM, iha Komandu Jerál PNTL Caicoli Díli, sesta feira (11/07/2025) foin lalais ne’e, Komandante Operasaun PNTL Superintendente Xefe Justino Menezes hateten, instituisaun PNTL iha despaixu hosi komandante jerál ba seguransa jogu CPLP.
“Instituisaun Polísia Nasionál Timor-Leste (PNTL) iha despaixu hosi Komandante jerál mai iha Komandu Operasaun PNTL hodi elabora planu, ba preparasaun hodi garante seguransa másimu ba jogu ida ne’e”, dehan Justino.
Komandante Operasaun ne’e hatutan, komandu iha ona planu ne’ebé efetivu ona, hahú foti informasaun hosi komisaun organizadora, elabora planu no enkontru preparasaun ba operasaun prelimináriu, enkuantu enkontru dahuluk hala’o ona iha loron rua fulan jullu liubá.
Superitendente Xefe Justino Menezes ne’e mós husu kontribuisaun PNTL hotu espesialmente iha munisípiu Díli atu asegura seguransa ba jogu refere.
“Foti kontribuisaun hosi komandante sira iha terenu, komandante unidade, komandante munisípiu espesiál iha Díli, ne’e mak reforsa apoiu seguransa”, Justino hatutan.
Jogu ne’e sei realiza iha loron 17 fulan jullu tinan 2025 no partisipa másimu husi komunidade CPLP mak hanesan, Portugal, Moçambique, Cabo Verde, Brasil, Guiné Bissau, Guiné Equatorial, São Tomé e Príncipe, Angola no Timor-Leste.
*
Hakerek testu: Luis Lopes
Editora : Ana
