MetroFM; Governu liuhusi Sekretaria Estadu ba Komunikasaun Sosiál (SECOMS sigla portugés) lansa sentru informasaun dijitál iha suku Kampung Alor, postu administrativu Dom Aleixo, munisípiu Díli, iha sede suku Kampung Alor, tersa feira (09/12/2025) ne’e.
Seremónia lansamentu ne’e, Sekretáriu Estadu Komunikasaun Sosiál Expedito Loro Dias Ximenes hamutuk ho Vise-Ministru Administrasaun Estatal Jacinto Rigoberto Gomes de Deus no Autoridade Suku inklui entidade no komunidade sira hodi hala’o lansamentu ba plataforma dijitál sentru informasaun suku, ho nia Website Ofisiál https://kampung-alor.suku.tl/ ho tema jerál “Elabora Informasaun hodi Kontribui ba Dezenvolvimentu”.
Sekretáriu Estadu Komunikasaun Sosiál Expedito Loro Dias Ximenes hateten, governu dasia konstituisionál iha nia polítika komunikasaun sosiál servisu hamutuk ho ministériu transporte komunikasaun inklui ministériu administrasaun estatal oinsá bele atualiza no dezenvolve plataforma dijitalizasaun ne’ebé dadaun la’o maka’as tebes iha era ne’e.
Sekretáriu Estadu ne’e dehan, iha formatu governu daualu polítika ida naroman ba suku iha kontestu informasaun ba suku, maibé iha governu ida ne’e halo mudansa ida husi naroman ba suku ba iha kontestu sentru informasaun suku dijitál.
“Lansa plataforma dijitál sentru informasaun suku ba dala tolu iha suku Kampung Alor no faze daruak iha suku Mascarenhas no fase inísiu husi suku Bidau Santana, sei nafatin kuntinua neneik maibé bebeik sei lansa iha suku hotu tuir pedidu ne’ebé mak submete mai iha SECOMS, ho avansu ida ne’e signifika katak bele ajuda komunidade hotu iha suku Kampung Alor bele hetan informasaun no atividade hotu liuhusi lansamentu plataforma dijitál sentru informasaun suku ho pájina suku nian ne’ebé hafasil komunidade bele asesu informasaun hotu husi telefone iha era dijitalizasaun ne’e, maibé lansamentu ne’e la’ós iha suku de’it maibé sei hala’o mós iha eskola sira ho naran jornál parede dijitál”, dehan Sekretáriu Estadu SECOMS.
Fatin hanesan Vise-Ministru Administrasaun Estatal Jacinto Rigoberto informa katak, lansamentu plataforma informasaun dijitál ida importante tebes iha era globalizasaun.
“Hanesan pasu aranka ida ba ita-nia administrasaun jestaun husi nível suku to’o iha postu no munisípiu sira to’o nasionál tanba ita agora iha era globalizadu tanba ne’e utilizasaun era dijitalizasaun no teknolojia hanesan komputadór avansu ida ho era dijitalizasun nia iha mundu modernu ida ne’e”, informa Vise-Ministru Jacinto.
Alén ne’e xefe suku Kampung Alor Estela Aleixo agradese ba ekipa SECOMS ne’ebé apoiu sira durante loron rua no apoiu ida ne’e bele dezenvolve suku ne’e hodi lori dezenvolvimentu ba nasaun ida ne’e.
“Apoiu ida ne’ebé husi Sekretáriu Estadu Komunikasaun Sosiál liuhusi fasilitasaun sentru informasaun suku no formasaun ba iha suku ida ne’e, hanesan istória boot ida ba nasaun ne’e no grasa boot ida ba iha suku Kampung Alor iha ha’u nia mandatu liuhusi nonu governu bele lansa ona plataforma dijitál iha ha’u nia suku no fiar katak iha situasaun sira ne’e ita sei servisu hamutuk hodi dezenvolve nasaun ida ne’e no suku Kampung Alor liu-liu iha era dijitalizasaun nian”, hateten xefe suku Kampung Alor.
Partisipa ba iha lansamentu ne’e, Sekretáriu Estadu Komunikasaun Sosiál (SECOMS) Expedito Loro Dias Ximenes, Vice-Ministru Administrasaun Estatal Jacinto Rigoberto Gomes de Deus, Administradór Postu Administrativu Dom Aleixo José de Jesus, xefe suku Kampung Alor Estela Aleixo, parte seguransa Polísia Nasionál Timor Leste (PNTL), Diretór Jerál, Diretór Nasionál, kargu xefia husi SECOMS no entidade hotu inklui komunidade sira. (Job/Ana)
