MetroFM; Sekretaria Estadu Komunikasaun Sosiál (SECOMS-sigla portugés) realiza enkontru ho autoridade postu Fatumea, munisípiu Covalima, kinta feira (02/10/2025) foin lalais ne’e, iha salaun administrasaun Fatumea, kona-ba planu sei harii rádiu komunidade ida iha postu ne’e iha tinan 2026 mai, hanesan meiu ida hodi fasilita di’ak liután komunidade sira-nia lian governu sentrál.
Administradór Postu Administrativu Fatumea Cesar Madeira Amaral iha nia intervensaun katak, sente orgullu no agradese ba governu da-9 liuhusi SECOMS ne’ebé tuir planu sei instala rádiu komunidade hodi lori informasaun atuál sira kona-ba dezenvolvimentu nasaun ba komunidade sira bele asesu.
“Harii rádiu ida iha ami nia postu Fatumea nune’e bele tulun komunidade sira bele hetan informasaun liuhusi atividade komunidade loror-loron nian, tantu atividade governu no igreja iha atividade moris loroloron komunidade nian liu-liu iha setór sosiu-ekonómiku alén de mós iha sira-nia preokupasaun aban bainrua depois rádiu komunidade ne’e instala lian no susar sira husi komunidade bele to’o ba governu sentrais”, hateten APA Fatumea.
Administradór ne’e mós dehan, provizoriomente rádiu ne’e sei hanaran rádiu komunidade Fatumea no tuir planu parte administradór sei halo aprosimasaun ho komunidade sira hodi defini naran ba rádiu komunidade refere.
“Alén de ne’e rádiu komunidade ho provizoriamente ita sei hanaran rádiu komunidade Fatumea karik tinan oin SECOMS iha planu harii mak parte administradór postu konsulta ho parte hotu mak hanesan parte igreja no veteranu sira nomós liña ministeriais hotu ho lia na’in sira hodi deside naran depois rádiu ne’e instala naran saida mak merese ita tau ba rádiu komunidade ne’e, tenik Nia.
Postu Administrativu Fatumea pertense ba munisípiu Covalima no iha postu ne’e iha suku tolu (3) aldeia sanulu resin rua (12) inklui ho nia totál populasaun rihun haat resin.
*
Hakerek testu : Job
Editora : Ana
