MetroFM; Sekretáriu Estadu ba Komunikasaun Sosiál Expedito Loro Dias Ximenes hateten liu husi interkámbiu ne’e bele mellora servisu radio komunidade ida-idak relásiona ho mudansa teknolojia ne’ebé la’o dadaun oras ne’e.

“Liu husi interkámbiu ne’e jornalista no jestor sira ida-idak bele fahe esperiensia servisu ba malu durante tinan ida nian nomos bele aumenta sira nia koñesimentu iha area plataforma dijital ne’e kria ona iha estasaun radio komunidade ida-idak, liu ema expert ba teknolojia husi governu nian”, dehan Expedito wainhira hala’o entrevista ho jornalista sira kuarta feira (15/10/2025) ne’e, iha salaun Parókia Santo António Balibo-Bobonaro iha ámbitu komemorasaun trajedia Balibo 5 ba dala limanulu (50) no selebrasaun loron nasionál liberdade imprensa ba dala 3.

Membru Governu konstitusionál IX  ne’e informa governu liu husi Sekretáriu Estadu Komunikasaun Sosiál (SECOMS Siglá Portugés) kontinua fo apoiu ba radio komunidade sira ne’ebé hasoru dezafiu ruma.

“ Liu husi diálogu ba loron ohin ita rona saida maka sira hato’o dezafiu sira liu-liu kona transmitter, ekipamentu tekniku sira, nomos kona edifisíu, sira nia servisu fatin, ha’u fo ona orientasaun ba diretór nasionál dezenvolvimentu media (DNDM) maka sei nafatin servisu hamutuk ho Asosiasaun Radio Komunidade Timor Leste (ARKTL) nune’e bele solusiona problema balun ne’ebé radio komunidade sira hasoru”, Tenik SEKOMS.

Ikus liu ezekutivu ne’e husu ba radio komunidade sira atu kontinua esplora pontensialidade husi munisipíu ida-idak iha seitór oin-oin.

Entretantu iha interkámbio loron daruak ne’e marka prezensa husi SEKOMS Expedito Loro Dias Ximenes, Diretór DNDM Manuel de Fatíma no Prezidenti ARKTL Prezado Ximenes, programa interkámbiu ne’e realiza tanba serbisu hamutuk entre SEKOMS ho ARTKL.

Partisipante interkámbiu ne’e mai husi Jestor no jornalista husi rádiu komunidade sira, estudante universitáriu sira (UNTL,UCT,UNITAL) nomos eskola sekundária publíka no privadu iha munisípiu Bobonaro.

*

Ekipa MetroFM