MetroFM; IX Governu konstitusionál liuhusi Sekretaria Estado Komunikasaun Sosiál (SECOMS sigla portugés) ofisialmente hala’o lansamentu ba RÁDIU KOMUNIDADE FRONTEIRA BALIBO 5 ho frekuénsia 98.3 megahertz iha postu administrativu Balibo munisípiu Bobonaro kuarta feira (15/10/2025) ne’e.
Iha intervensaun Sekretáriu Estadu Komunikasaun Sosiál Expedito Loro Dias Ximenes informa loron ohin importante tebes ba komunidade Postu Balibo tanba Governu lansa ona Rádiu Komunidade ida ne’ebé ho naran istóriku Radiu Komunidade Fronteira Balibo 5.
“ Loron ohin bele dehan importante tebes no istóriku tebes, istóriku tanba edifísiu simples ida ne’e, istóriku tanba jornalista nain 5, ita hotu koñese katak iha situasaun ne’ebé difisil jornalista nain 5 husik hela sira nia servisu, husik hela sira nia familia ho sakrifisiu bo’ot defende lia los , defende dalan los hodi defende ita nia liberdade, defende direitu povu Timor Leste nian, tanba ne’e maka edifisiu ida ne’e, ita bele tau naran radio komunidade fronteira Balibo 5”, dehan SEKOMS.
Nia hatutan ho naran Rádiu komunidade fronteira Balibo 5 ne’e hanesan parte ida hodi fó omenazen no respeitu ba jornalista sira ne’ebé mate iha trajedia Balibo iha tinan 50 liu ba.
“ Ita fó omenazen, ita nia respeitu ho ita nia onra no gloria ba ita nia jornalista nain 5”, haktuir membru governu ne’e.
Ezekutivu ne’e informa oras ne’e radio komunidade hamutuk ruanulu resin (21) konta mos ho rádiu komunidade fronteira Balibo 5 hamutuk ona radio komunidade ruanulu resin (22) ne’ebé eziste iha teritoriu Timor Leste.
Iha fatin hanesan Reprezentante Prezidenti Autoridade Bobonaro Julio Caeiro hateten, orgullu boot ba povu Balibo tanba governu harii ona Rádiu komunidade fronteira Balibo 5, ho meiu ida ne’e fó espasu ba komunidade sira hato’o sira nia aspirasaun ne’ebé ne’e sira infrenta.
Parte seluk administradór Postu Administrativu Balibo Casemiro dos Santos hato’o agradese ba IX Governu Konstitusionál liuhusi Sekretaria Estado Komunikasaun Sosiál tanba bele responde duni komunidade Postu Balibo nia proposta konaba hari’i radio komunidade fronteira Balibo 5.
Entretantu partisipa iha serimónia lansamentu ne’e Prezidente Konsellu Imprensa, Prezidente RTTL,EP, Prezidente Tatoli,IP, Padre Paroko Parókia Santo Antonio Balibo, Asosiasaun Jornalista sira, Jestór no Jornalista Rádiu Komunidade sira inklui mós komunidade husi Postu Balibo.
*
Ekipa MetroFM (DNDM/SEKOMS)
