MetroFM; Sekretaria Estadu Komunikasaun Sosiál (SEKOMS), realiza avaliasaun jerál no reflesaun anuál atividade tinan 2025 ba funsionáriu sira, iha salaun Luz Clarita, Díli tersa feira (23/12/2025) ne’e.
Sekretáriu Estadu Komunikasaun Sosiál Expedito Loro Dias Ximenes hateten, avaliasaun no reflesaun ne’e atu halo diskusaun ba progresu servisu durante tinan ida nia laran inklui dezafiu sira.
“Ohin Sekretaria Estadu Komunikasaun Sosiál halo enkontru ho funsionáriu permanente no funsionáriu kontratadu sira, hodi hato’o kona-ba servisu ne’ebé Sekretaria Estadu halo durante tinan ida nia laran 2025 nian, halo avaliasaun ba diresaun idaidak nia servisu, nomós rona funsionariu sira-nia hanoin, hodi hadi’a buat balu durante tinan ida nia laran la’o seidauk di’ak no presiza hadi’a nomós halo presepsaun ba tinan 2026 bele la’o ho di’ak”, hateten Sekretáriu Estadu SEKOMS.
Sekretáriu Estadu ne’e mós dehan, besik ba natal sempre enkontru amizade hodi sira-nia hanoin atu nune’e iha tinan 2026 ba diresaun sira hala’o servisu tuir planu ne’ebé trasa ona iha governu, durante tinan lima nia laran nomós planu asaun tinan ida nian.
Governante ne’e realsa liu tan katak, enkontru ne’ebé hala’o ho ambiente di’ak no kontente, hein katak iha naksalak balun ne’ebé akontese iha tinan 2025 bele hadi’a iha tinan 2026 di’ak liután.
Iha enkontru avaliasaun ne’e Sekretáriu Estadu Komunikasaun Sosiál atribui mós sertifikadu apresiasaun no agradesimentu ba tinan ida nian ba funsionáriu sira tantu permanente no kontratadu.
Entretantu partisipa iha enkontru ne’e Deretór Jerál komunikasaun Sosiál, Xefe Gabinete SEKOMS, Diretór Nasionál, Xefe Departamentu sira, funsionáriu permanente no funsionáriu kontratadu sira, inklui média nasionál sira. (Luis/Ana)
