MetroFM; Susuben inan hanesan protesaun ne’ebé di’ak ba bebé hodi prevene moras oin-oin inklui mós inan sira hodi prevene moras kankru susun, tanba ne’e Ministériu Saúde (MS) sei halo kampaña hodi fó koñesimentu fila fali ba inan aman sira atu tau importánsia ba susuben inan nian.
Kampaña ne’e hodi selebra loron mundiál iha Timor Leste ba susuben kinur inan sira sei hala’o iha loron ida to’o loron hitu fulan agostu tinan 2025 ho tema mundiál ba kampaña susuben inan ne’e maka, “prioritiza fó susuben inan ba bebé kria sistema sustentavel sira (Prioritice Breasfeeding, Create Sustenaible Support System)”.
“Ita hotu hatene katak susuben inan ne’e entaun objetivu ba kampaña refere atu halo saida, atu hafanun fali inan sira ne’ebé maka iha uma, maske iha uma ou servisu fatin sira, atu sira nafatin tau importánsia ba susuben inan nian tanba ita hatene katak susuben inan hanesan protesaun di’ak ba bebé hosi moras hotu-hotu, infesaun sira hotu nune’e mós importante ba inan atu prevene hosi moras hanesan kankru sira, kankru susun nian”, dehan ofisiál ba programa susuben inan doutora Natalia dos Reis Araújo liuhusi entrevista Programa Saúde iha rádiu MetroFM, tersa feira (15/07/2025) ne’e.
Doutora ne’e mós hateten, susuben inan eskluzivamente tenke fó susu husi bebé moris to’o tinan rua no akompaña mós ho hahan komplementar sira.
“Husi moris to’o fulan neen (6) eskluzivamente la fó bee ruma, bebidas ruma jus ruma, susuben formula, tenke fó de’it susuben inan ba bebé, husi moris to’o fulan 6, eskluzivamente i depois kontinua nafatin fó susuben inan ba bebé to’o iha tinan rua (2), akompaña ho hahan komplementáriu sira”, Tenik Natalia.
Ofisiál programa ne’e enkoraja família (aman) sira atu suporta inan sira hodi nafatin fó importánsia ba susuben inan nian tanba hanesan vasinasaun dahuluk ba oan sira no ajuda dezenvolve ba oan nia kakutak.
Tuir ajenda Ministériu Saúde sei komemora loron mundiál susuben inan ne’e hala’o iha Rejiaun Administrativa Espesiál Oecusse Ambeno (RAEOA).
*
Hakerek testu : Elidio castro
Editora : Ana
