MetroFM; Operadór Telkomsel ho rádiu komunidade Sahe Bucoli hala’o enkontru kona-ba sei fó apoiu liña internet ne’ebé sei oferese ba rádiu komunidade (Rakom) sira, iha edifísiu Telkomsel Timor Plaza, Díli, segunda feira (08/09/2025) ne’e.
Manajer marketing Telekomsel Maria Pade hateten, parte Telkomsel konsege servisu hamutuk ona ho rádiu komunidade lima (5) mak hanesan rakom Maliana, Tokodede Liquiça, Atoni-Lifau Oecusse no Baucau.
“Husi Telkomsel fornese internet kada fulan ba rádiu komunidade lima ne’ebé servisu hamutuk ho operadór Telekomsel, sira husu atu produz pakote husi Telkomsel nian hodi distribui ba rádiu komunidade sira bele produz, alende ne’e parte Telkomsel sei louva tebes ba rádiu komunidade ne’ebé mak servisu ho fuan no voluntariamente iha rádiu komunidade”, hateten Pade.
Tuir Nia, iha tempu badak Telkomsel sei servisu hamutuk mós ho rádiu komunidade sira ne’ebé iha parte leste.
“Agora daudaun parte operadór Telkomsel mos kontinua ona servisu hamutuk ho rádiu komunidade Bucoli tuir proposta ne’ebé rádiu ne’e submete mai no tuir planu semanaoin sira sei halo vizita ba parte leste ninian hanesan, rádiu komunidade Manatuto, Baucau inklui mós Bucoli, Viqueque no Lospalos”, tenik Nia.
Fatin hanesan jestora Rakom Bucoli Josefina da Costa agradese ba parte Telkomsel ne’ebé bele servisu hamutuk rádiu komunidade Bucoli, hodi hatan ona ba proposta ne’ebé sira submete.
“Rádiu komunidade Bucoli hahú servisu tuku 02 to’o 10 oras kalan programa ne’ebé mak ami lori durante oras ualu (8) nia laran, no ami prontu servisu hamutuk ho operadór telkomsel wainhira apoiu pakote internet”, dehan jestora Bucoli.
Iha Enkontru ne’e akompaña husi xefe departamentu Diresaun Nasionál Dezenvolvimentu Média (DNDM), jestora Rakom Bucoli, inklui manajer marketing Telkomsel.
*
Hakerek textu: Job/Gualdino
Editora : Ana
