MetroFM; Vise-Ministru ba Asuntu Parlamentár, Aderito Hugo da Costa, husu ba entidades Estadu nian atu servi povu, Nasaun ho di’ak no ho responsabilidade.
Mensajen ne’e hato’o bainhira nia sai inspetór iha serimónia hasae Bandeira Nasionál ba semana dahuluk fulan Fevereiru tinan 2026, iha resintu Palásiu Governu, Segunda-feira (02/02/2026).
“kompromisu Governu nian tenke halo hamutuk ho entidades hotu iha administrasaun públika, inklui funsionáriu públiku no ajente Estadu sira, atu garante servisu ne’ebé di’ak ba povu tuir ajenda nasionál Estadu nian, servidór Estadu sira iha dever atu fó atendimentu di’ak no transparante ba komunidade”, dehan Membru Governu da Sia ne’e.
Governante ne’e mos hatutan katak nonu Governu hahú mandatu iha tinan 2023 no sei remata iha tinan 2028, to’o agora Governu kompleta ona tinan rua resin no kontinua implementa programa no ajenda sira ne’ebé promete ba povu.
Partisipa iha serimónia hasae Bandeira Nasionál ne’e mak Primeiru-Ministru Kayrala Xanana Gusmão, Vise-Ministru ba Asuntu Parlamentár Aderito Hugo da Costa, Sekretáriu Estadu Komunikasaun Sosiál Expedito Loro Dias Ximenes, Prezidenti Komisaun Funsaun Públika Agustinho Letêncio de Deus, Diretor Jerál sira, asesór nasionál no internasionál, membru PNTL, no funsionáriu públiku sira seluk. *(Luis)
