MetroFM; Sorumutu Konsellu Ministru (KM) iha Palásiu Governu, kuarta feira (21/01/2026) ne’e, Vise-Ministra ba Asuntus ASEAN, Milena Maria da Costa Rangel, halo aprezentasaun ida ba Konsellu Ministru (KM) kona-ba partisipasaun Timor-Leste nian iha Sorumutu Funsionáriu Importante sira ASEAN tinan 2026 (ASEAN SOM) nian, ne’ebé sei hala’o iha loron 28 fulan-janeiru tinan 2026, no iha Retiru Ministru Negósius Estranjeiru ASEAN (AMM Retreat) nian, ho tema “La’o Hamutuk ba Ita-nia Futuru”, ne’ebé ajenda ba loron 29 fulan-janeiru tinan 2026, sorumutu rua ne’e hala’o iha Cebu, Filipina.
Aprezentasaun ne’e foka ba tema prinsipál sira ne’ebé sei diskute iha sorumutu sira ne’ebé temi ona, ho destaka ba prioridade sira hosi Prezidénsia ASEAN Filipina nian ba tinan 2026, akompaña ba desizaun sira hosi Simeiras ASEAN foin lalais ne’e no análize hosi relasaun externa organizasaun nian, nomós kestaun rejionál no internasionál sira ne’ebé fó impaktu ba dame, seguransa no estabilidade rejionál.
Kona-ba Timor-Leste, subliña katak enkontru sira-ne’e importante tebes iha kontestu pós-adezaun, hodi marka tranzisaun ba partisipasaun ida ne’ebé plena no ativa iha ASEAN nia laran.
Destaka mós kompromisu atu garante integrasaun armonioza, liuhosi hametin koordenasaun institusionál, prepara mekanizmu nasionál sira no envolvimentu konstrutivu iha prosesu ne’ebé relasiona ho polítika no seguransa, nomós ho diplomasia organizasaun rejionál nian.*
Fontes ba informasaun ne’e husi : Portal Governo
