MetroFM-RCL ; Violénsia bazeia ba jéneru rejista aas iha munisípiu Lautem durante fulan neen (6) hahú husi fulan janeiru to’o juñu tinan ne’e ho totál kazu hamutuk ruanulu resin hitu (27) ralata hosi Polísia Nasionál Timor Leste (PNTL) Lautem liuhusi diresaun Servisu Apoiu Pesoál Vulneravel (Vulnerable Persons Unit-VPU).
Xefe Servisu Apoiu Pesoál Vulneravel munisípiu Lautem Inspetór Asistente Polísia Gil Pereira ba rádiu komunidade Lospalos-Vox Populi, sesta feira (18/07/2025) foin lalais ne’e hateten, kazu violénsia bazeia ba jéneru ne’ebé mak rejista iha Servisu Apoiu Pesoál Vulneravel (VPU) munisípiu Lautem, kazu hirak ne’e maioria mak kazu Violasaun Seksuál.
“Kazu violénsia bazeia ba jéneru ne’ebé mak rejista iha Servisu Apoiu Pesoál Vulneravel Ka VPU munisípiu Lautem hamutuk Ruanulu Resin hitu (27) kompostu husi kazu violénsia sesksuál, kazu volénsia doméstika, kazu integradu fíziku simples no kazu mostratus nian no husi kazu hirak ne’e maioria mak kazu violasaun seksuál no kazu hirak ne’e balun prosesa ona ba julgamentu iha Tribunál no balun sei iha prosesa nia laran”, hateten xefe Gil Pereira.
Iha fatin hanesan tékniku profesionál Sekretaria Estadu Igualidade (SEI) munisípiu Lautem Leozita da Costa afirma, liuhusi kazu violénsia bazeia ba jéneru ne’ebé aas iha munisípiu ne’e parte SEI mós sei kontinua hala’o atividade advokasia ba komunidade sira liu-liu foinsa’e sira.
“Liuhusi kazu violénsia bazeia ba jéneru ne’ebé mak sei aas iha munisípiu Lautem ne’e Parte SEI mós sei kontinua hodi halo atividade advokasia ba komunidade no joven sira, nune’e ita-nia komunidade no ita-nia joven sira bele iha konsiénsia hodi minimiza kazu hirak ne’ebé mak akontese iha munisípiu Lautem”, dehan Leozita da Costa.
Além ne’e xefe programa fundasaun Dame, Jorginho Madeira mós relata, fundasaun Dame sei fó kapasitasaun nafatin ba autoridade komunitáriu, komunidade inklui joven sira, nune’e komunidade sira bele iha koñesimentu kona-ba aktu violénsia ne’e, tanba aktu ne’e kazu krime públiku.
“Ami husi fundasaun Dame mós sei fó kapasitasaun nafatin ba Autoridade komunitáriu, komunidade inklui joven sira nune’e ita-nia komunidade sira mós bele iha koñesimentu kona-ba aktu violénsia ne’e tanba aktu violénsia ne’e kazu krime públiku”, relata xefe programa fundasaun Dame Jorginho Madeira.
Entretantu Servisu Apoiu Pesoál Vulneravel husu nafatin ba komunidade munisípiu Lautem atu bele iha konsiénsia hodi minimiza aktu violénsia tanba aktu violénsia ne’e kazu krime públiku.
*
Hakerek testu : Elidio Castro/Linda
Editora : Ana
