Lautem, Dadus dezastre naturál ne’ebé rekolla husi autoridade protesaun sivíl no jestaun dezastre naturál rejista ona uma hamutuk neennulu resin sia (69) iha munisípiu Lautem durante fulan neen (6) husi janeiru to’o juñu tinan 2025.
Liuhusi rádiu komunidade Lospalos, jornalista Nito Soares ba rádiu Metro FM, segunda feira (30/06/2025) katak, dadus ne’e aprezenta husi autoridade protesaun sivíl munisípiu Lautem no ekipa jestaun dezastre naturál munisípiu ne’e nian bazeia ba ekipa rekolla iha terenu.
Diretór protesaun sivíl jestaun dezastre naturál munisipiu Lautem Casimerio Assunção Pires informa, dadus ne’ebé sira rejista ona hamutuk neennulu resin ualu (68) dadus hirak ne’e sira-nia ekipa rekolla durante iha suku no aldeia sira iha munisípiu Lautem.
“Dadus hirak ne’e kompostu husi anin sobu uma limanulu resin sia (59), ai hanehan uma rua (2) ahi han uma hitu (7) inklui mós ema ida mota lori iha postu administrativu Luro, família afetadu sira ne’e fó ona tulun emerjénsia ba família vítima sira no hein de’it material rekoperasaun ba uma sira ne’ebé hetan estragus ne’e”, dehan Pires.
Relasiona ho númeru dezastre naturál ne’ebé boot iha munsipiu ne’e, administradór postu administrativu Lospalos vila Olderico Coimbra husu nafatin ba ekipa jestaun dezastre nian atu rekolla informasaun husi komunidade ho di’ak hodi bele atende komunidade sira ho di’ak.
Entertantu, husi totál uma komunidade nian 69 ne’ebé hetan estragus husi kalimidade ka dezastre naturál ne’e a’at kman iha ruanulu resin hitu (27), a’at natón iha uma ualu (8) no a’at totál iha uma rua (2), no uma kain tolunulu resin ida (31) la tama ba kategoria hetan tulun husi governu tuir kritériu ekipa jestaun dezastre naturál nian.
Hakerek testu : Elidio Castro/Nito Soares
Editora : Ana
