DILI : Komisaun Funsaun Públika (CFP-sigla português) sei implementa reforma obrigatóriu ba funsionáriu no ajente administrasaun públika sira iha munisípiu tolu mak hanesan, munisípiu Manufahi, Ainaro, no Aileu.
Liuhusi entrevista ba programa matadalan ba servidór estado iha rádiu Metro FM, Kintal-Boot, Díli, kuarta feira (25/06/2025) ne’e, diretór nasionál baze dadus Moises Almeida Sousa Pedroso hateten, programa divulgasaun lejislasaun kona-ba reforma obrigatóriu ne’e bazeia ba dekretu Lei númeru 09/2025.
“Divulga dekretu Lei númeru 09/2025, ne’ebé promulga husi Prezidente Repúblika José Ramos Horta iha loron 30 fulan Abril, antes dekretu Lei ne’e mosu, Parlamentu Nasionál hasai ona dekretu Lei númeru 07/2024, hodi fó kompeténsia ba Komisaun Funsaun Públika, hodi hahoris dekretu Lei númeru 09/2025, divulgasaun sira ne’e la’o ona iha munisípiu tolu mak hanesan Manufahi, Ainaro, Aileu”, dehan Pedroso.
Diretór nasionál baze dadus ne’e hatutan, komisaun nia papél atu divulga dekretu Lei númeru 09/2025, no altera ba estatutu funsaun públika iha artigu 116 sesaun servisu nian hateten, mate no pena, ho alterasaun dekretu Lei ne’e, hodi hamosu tan alinea B limite tinan iha funsaun públika, dekretu Lei ne’e hateten limite tinan neennulu resin lima (65) ba leten reforma ona.
Objetivu ne’e mak funsionáriu no ajente administrasaun públika sira, ne’ebé mak ho tinan 56 ba leten hetan ona reforma, antes komisaun tun ba divulga informasaun sira ne’e ba dekreitu Lei ne’e, komisaun mós haruka ona lista ba funsionáriu sira ne’ebé idade liu ona reforma ba iha rekursu umanu nian, iha munisípiu tolu ne’ebé mak iha.
Tuir dadus funsaun públika total funsionariu ne’ebé ho tinan 60 to’o 65 hamutuk rihun haat, atus hitu limanulu resin rua (4.752)
Hakerek testu : Luis
Editora : Ana
