MetroFm; Projetu Programa Nasionál Dezenvolvimentu Suku (PNDS) iha aldeia Rembor, suku Aiteas, postu administrativu Manatuto Vila, Manatuto to’o daudaun ne’e seidauk implementa.
Liuhusi rádiu komunidade Iliwai Manatuto mai rádiu MetroFM iha programa “Metro Loron Ohin”, sesta feira (26/09/2025) ne’e, xefe aldeia Rembor António Soares hateten, materiál ba konstrusaun kompletu hela maibé tau de’it iha komunidade nia uma durante tinan ida ona.
“Programa ida ne’e materiál kompletu maibé la realiza, iha 2025 ninian iha aldeia Rembor ami hetan ba rehabilita uma profesór nian projetu PNDS rehabilitiasaun uma profesór nian la’o hela agora ida rehabilita bee ne’e mak seidauk implementa to’o agora, materiál mai hatun ona maibé seidauk realiza to’o agora”, hateten xefe aldeia Rembor.
Enkuantu xefe suku Aiteas Bernarda Gomes Soares afirma, autoridade suku Aiteas relata ona ba diresaun munisipál Manatuto maibé to’o dadaun ne’e seidauk iha resposta serteza husi munisípiu.
“Iha suku ne’e projetu PNDS halai ba emerjénsia projetu ne’e iha fulan Novembru nia laran ha’u rasik asina projetu hirak ne’e implementa ba aldeia rua aldeia Karlilo no aldeia Rembor, aldeia Karlilo halo kampu futsal no aldeia Rembor mak hetan projetu ida fura bee moos, xefe suku asina iha momentu ne’e maibé até agora seidauk implementa osan sai ona maibé seidauk implementa ami la’o buka hela osan ne’e maibé lahatene iha ne’ebé ha’u rasik halo karta ba PAM (Prezidente Autoridade Munisípiu) maibé seidauk iha resposta”, afirma xefe suku Aiteas.
Entretantu, programa Programa Nasionál Dezenvolvimentu Suku pendente la’ós husi suku maibé demora husi munisipál no totál orsamentu ba projetu rua ne’e hamutuk millaun hitunulu resin lima.
*
Hakerek testu : Castro-Vasco-Laurenti
Editora : Ana
