MetroFM; Konsellu Ministru (KM) hala’o sorumutu iha Palásiu Governu Dili, kinta feira (18/09/2025) ne’e, analiza aprezentasaun preliminár husi Ministra Finansa, Santina José Rodrigues F. Viegas Cardoso kona-ba projetu Dekretu-Lei ne’ebé ho objetivu atu regula Lei n. 3/2025, loron 23 fulan-abríl, kona-ba Enkuadramentu Orsamentu Jerál Estadu no Jestaun Finanseira Públika nian.
Objetivu husi diploma ida-ne’e mak atu asegura implementasaun tomak ba Lei Enkuadramentu Orsamentu no Jestaun Finanseira Públika nian, hametin kompromisu Governu Konstitusionál IX ho jestaun finanseira ida ne’ebé sólida, transparente no orientada ba rezultadu sira bazeia ba dixiplina, responsabilizasaun no utilizasaun efisiente ba rekursu públiku sira.
Alén ne’e, iha mós aprezentasaun hosi Vise-Primeiru-Ministru, Ministru Koordenadór Asuntus Ekonómiku no Ministru Turizmu no Ambiente, Francisco Kalbuadi Lay, kona-ba projetu konstrusaun Sentru Internasionál Konvensoins Dili.
Prevee ba zona portu tuan, iha baía Díli nia sorin, empreendimentu sei sai hanesan marka arkitetóniku no símbolu transformasaun nasionál, liuliu iha kontestu integrasaun ba ASEAN.
Kompleksu ne’e sei inklui edifísiu prinsipál ba Sentru Internasionál Konvensoins, ho sala konferénsia, auditóriu sira no pavillaun espozisaun nian, nune’e mós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida no sentru divertimentu no komérsiu ida.
Objetivu hosi projetu ne’e mak atu revitaliza kapitál nia tasi-ibun no halo Dili sai destinu ba eventu internasionál boot sira, hodi promove turizmu, hasa’e ekonomia no kria oportunidade foun ba komunidade lokál.
*
Fontes informasaun ne’e husi portal governu : Sorumutu Konsellu Ministrus loron 18 fulan-setembru tinan 2025
