RCL-MetroFM; Autoridade Munisípiu Lautém liuhusi Administradór Postu Administrativu (APA) Tutuala sei muda rusa fuik sira iha illa Jaco mai parke nasionál Nino Konis Santana Lospalos tanba illa refere laiha ona aihan no bee moos, nune’e maka admnistradór ne’e iha komitmentu muda rusa fuik hirak ne’e.

Liuhusi reportajen ne’ebé jornalista rádiu komunidade Lospalos Nito Soares mai rádiu MetroFM iha programa ‘Metro Loron Ohin’ kuarta feira (24/09/2025) ne’e, administradór postu Tutuala Carlito Pereira hateten, rusa fuik sira ne’e persiza muda hodi salva guarda tanba rusa sira ne’e sofre ba ai-han iha tempu bailoro no bee moos laiha.

“Rekomenda mós ba ministériu relevante atu tau atensaun sériu hodi muda rusa sira ne’e mai iha parke nasionál Nino Konis Santana Lospalos hodi bele asegura populasaun rusa iha illa Jaco, rusa hirak ne’e kada tinan aumenta nia populasaun maibé balun mate tanba bee moos no ai-tahan iha illa Jaco laiha”, hateten Carlito.

Administradór ne’e mós dehan, muda rusa hirak ne’e persiza ministériu relevante tulun liuhusi osan no peritu animál nian hodi bele muda rusa sira seguru mai iha parke nasionál ne’e.

Sorin seluk xefe departementu delegasaun territoriál planta indústria husi Ministériu Agrikultura, Pekuária, Peska no Floresta (MAPPF) Domingos Oliveira afirma, ministériu iha ona planu hodi muda rusa hirak ne’e maibé seidauk iha orsamentu.

“Daudaun ne’e rusa iha illa Jaco hamutuk atus ualu (800) área Jaco iha de’it área hektares sanulu resin rua nune’e la sufisiente ona ba rusa fuik sira ne’e, moris iha illa ne’e persiza atu muda duni mai parke indústria”, afirma Domingos.

Entretantu, tuir observasaun iha terrenu katak rusa hirak ne’e labele ona halai wainhira vizitante sira ba vizita illa Jaco, kauza husi ai-han no bee moos laiha.

*

Hakerek testu : Elidio-Nito

Editora : Ana