MetroFM; Asosiasaun Rádiu Komunidade Timor-Leste (ARKTL) sei hala’o interkámbiu iha Postu administrativu Balibo, minisípiu Bobonaro durante loron tolu mak hanesan loron 14 to’o 16 fulan Outubru tinan ne’e.
Objetivu hosi interkámbiu ne’e atu halibur jestór sira hodi fahe sira-nia esperiénsia servisu durante tinan ida nia laran, susesu, dezafiu no oportunidade iha futuru.
Prezidenti Asosiasaun Rádiu Komunidade Timor-Leste (ARKTL), Prezado Ximenes asina memorandu interkámbiu ho Diretór Diresaun Nasionál Dezenvolvimentu Média (DNDM), Manuel de Fátima, iha edifísiu Kintal Boot Dili, kinta feira (25/09/2025) foin lalais ne’e.
Programa interkámbiu ne’e ARKTL mak sai komisaun organizadora, enkuantu interkámbiu ne’e iha Balibo hodi komemora loron nasionál ba imprensa no tinan 50 trajedia Balibo V.
Totál rádiu komunidade hamutuk rua nulu resin ida (21), rádiu komunidade Lospalos, rádiu komunidade povu Viqueque, rádiu komunidade lian matebian Baucau, rádiu komunidade Sahe Bucoli, rádiu komunidade Maubisse Mauloko, rádiu komunidade Rai Husar Aileu, rádiu komunidade Kafe Ermera, rádiu komunidade Tokodede Liquiça, rádiu komunidade Lian Proklamadór Turiscai Same, rádiu komunidade Cova Taroman Covalima, rádiu komunidade Maliana, rádiu komunidade 1912 Same, rádiu komunidade Iliwai Manatuto, rádiu komunidade Atoni Lifau, rádiu komunidade Manu Koko Atauro, rádiu komunidade Laclubar lian Idate, rádiu komunidade Ainaro, rádiu komunidade Comoro, rádiu komunidade Loriku Lian, rádiu komunidade Defisiénsia Timor Leste, rádiu komunidade lian Fronteira Balibo-5.
Programa interkámbiu ne’e halo parseria ho Sekretária Estadu Komunikasaun Sosiál (SECOMS sigla portugés), liuhusi Diresaun Nasionál Dezenvolvimentu Media (DNDM) no sei partisipa iha interkámbiu ne’e husi universidade sira mak hanesan Universidade Catolica Timorense (UCT), Universidade Oriental Timor Lorosa’e (UNITAL) no Universidade Nasional Timor Lorosa’e (UNTL) inklui jornalista rádiu komunidade sira.
*
Hakerek testu : Luis
Editora : Ana
