MetroFM : Planu Governu dasia liuhusi Ministru Dezenvolvimentu Rurál no Abitasaun Komunitária atu fó prioridade ba Komisaun Funsaun públika (KFP) atu haree funsionáriu públiku sira ne’ebé tama ba reforma obrigatóriu.
Vise Primeiru Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu Mariano Assanami Sabino husu ba prezidente funsaun públika atu bele halo mudansa iha tinan 2026 hodi haree funsionáriu sira ne’ebé atu reforma.
“Iha 2026 sei iha mudansa lubuk ida atu reajusta reforma mákina estadu ida ne’e para bele forte liután ba oin, maibé sei reflete liubá, pilares importante sira ne’ebé mak ita konsege ita hetan liberdade ida ne’e, ita konsege hetan ita-nia independénsia tanba iha pilares balun ne’ebé ita tenke reflete nafatin ba ita ohin loron”, hateten Vise PM Assanami bainhira nu’udar inspetór ba seremónia hasa’e bandeira semana dahuluk fulan Dezembru, iha Palásiu Governu, Segunda feira (01/12/2025) ne’e.
Alén ne’e, Vise PM ne’e enkoraja funsionáriu sira, iha tinan oin tenke servisu ho unidade iha instituisaun estadu sira.
“Tinan 2026 ne’ebé ita sei simu, ita esforsu para ita kria unidade iha ita idaidak nia servisu fatin, ita kria konsidera malu katak ita hotu-hotu importante husi diretór jerál to’o mai ida dasa rai, komponente ida ne’ebé hamutuk mak ita bele sai forsa”, tenik Nia.
Partisipa iha hasa’e bandeira ba semana dahuluk fulan dezembru tinan ne’e mak, Sekretáriu Estadu Komunikasaun Sosiál Expedito Loro Dias Ximenes, Diretór jerál sira, Xefe Gabinete sira, Diretór Nasionál sira, kargu xefia sira no funsionáriu sira. (*)
