MetroFM ; Atu hasa’e kualiadade manorin Timor Leste iha area teknologia no inovasaun digital, Ministério Edukasaun liu husi Diresaun Nasionál Ensino Secundário Geral ( DNESG ) servisu hamutuk ho Instituto Nacional de Formação de Docentes e Profissionais da Educação (INFORDEPE), haruka manorin nain rua nulu resin tolu (23) partisipa iha Workshop no Fellowship Study on Technology-Based Learning Media ne’ebé hala’o iha SEAMOLEC Jakarta, Indonésia, husi loron 1 to’o 5 Dezembru 2025.
Manorin sira hetan oportunidade ne’e hanesan parte ida ne’ebé diak tebes atu hasae tan kuñesimentu manorin sira nian iha area tekolojia hodi nune’e bele hanorin hikas estudante sira iha eskola.
Dada lia via wahatsapp ho manorin nain Sudaryatin ho jornalista radio Metro FM husi Jakarta-Indonesia manorin ne’e informa katak sente urgullu no agradese tanba husi 43 manorin ne’ebé foin daudauk tuir formasaun iha INFORDEPE Dili iha fulan outubru liu ba, nia naran selesionadu husi SEAMOLEC hamutuk ho manorin nain 8 seluk hetan opurtunidade atu tuir formasaun ih Jakarta-Indonesia.
“Materi ne’ebé mk ami hetan mk materi integrasaun AI iha prosesu apredijazen hanesan, gamma, heygen, lumen 5, canva, wayground no teachy no ami mos hetan vizita husi professor Japaun ISODA Sensei, ne’ebé sosializa kona-ba formasaun robotic AI, Tuir plano ME no INFORDEPE formasaun ne’ebé ami simu ne’e sei kontinua hatutan ba manorin sira iha kada munisipiu atu nune’e sira bele kapasita sira nia kuñesimentu oinsa Integra tenknologi AI iha prosesu apdrendizajen”, dehan Nia.
Workshop ida ne’e hetan konsiderasaun bo’ot tanba kontribui atu hadia pratika pedagójiku, integra Inteligénsia Artificial (AI), no fó transformasaun digital iha sistema edukasaun Timor-Leste
Mnaorin nain 23 ne’e lidera husi Vice-Presidente Gabinete Peskiza, Dezevolvimentu, Monitorizasaun no Avaliasaun (GPDMA-INFORDEPE), Dr. Sebastião de Oliveira, partisipa iha programa importante ho SEAMEO Regional Open Learning Centre (SEAMOLEC) iha Jakarta, Indonésia.
Iha abertura Vice-Presidente Gabinete Peskiza, Dezvolvimentu, Monitorizasaun no Avaliasaun (GPDMA-INFORDEPE), Dr. Sebastião de Oliveira hateten misaun ida ne’e konsentra ba fortalesimento kapasidade formador, profesór no ofisiál edukasaun sira, liuhosi programa rua ne’ebé fó oportunidade foun ba integrasaun Inteligénsia Artificial (AI) no aprendizajen dijital iha sistema edukasaun Timor-Leste.
“Programa uluk, Workshop Regional “Teaching in the Age of AI: From Awareness to Innovation”, reúni delegadu husi nasaun membru SEAMEO 11 atu fó literasia AI, pratika hanorin inovador no troka esperiénsia pedagójiku, Timor- Leste representadu ho delegadu 22, Programa segundu, Comparative Study and Training Program, nia objetivu atu hadi’a prontidaun rekursu umanu iha aprendizajen online no integrasaun AI ba prosesu hanorin, Formador no profesór sira Timor-Leste mak partisipa iha treinamentu ida ne’e, “ Vice-Presidente GPDMA- INFORDEPE hateten.
Sebastião de Oliveira hatutan katak transformasaun digital no AI sai prioridade iha INFORDEPE ba tinan 2026–2028, no parseria ho SEAMOLEC fó oportunidade bo’ot atu aprende hosi instituisaun aumenta kualidade edukasaun nasionál.
Iha fatin hanesan, Gerstór Interinu ba Divizaun Parceria Komunidade, Marketing no Publikasaun SEAMOLEC Nurhajati, iha nia diskursu hateten katak espera liu formasaun ne’e bele responde nesesidade manorin Timor Leste iha area Teknolojia dijital liu-liu integra AI iha prosesu aprendizajen nia laran.
“Ita sei aprende hamutuk durante loron lima (5) nia laran no espera bele fó benefisiu ba manorin sira hodi hasa’e kapasidade iha integrasaun teknojia AI ba prosesu aprendizajen, nu’une manorin sira bele halo modulu apredizajen ne’ebé interativu no inovativu no ikus objetivu aprendizajen bele atinji ho másimu, “ Jestór Interinu ba Divizaun Parceria Komunidade, Marketing no Publikasaun SEAMOLEC ne’e hateten.
Etretantu partisipantes husi workshop ne’e hamutuk ema nain rua nulu resin tolu (23) kompostu husi manorin sekundaria ema nain sia (9) , formador husi INFORDEPE ema nain ualu (8) no pesoál husi DNESG ema nain neen (6), enkuantu husi manorin nain 9, manorin ida husi ESG Lere Anan Timur maka Sudaryatin. (*)
