MetroFM; Sekretariu Estadu ba Komunikasaun Sosiál (SEKOMS) Expedito Loro Dias Ximenes, ofisialmente lansa Website aliansa verifikadór faktu iha Konsellu Imprensa (KI), iha Edifisiu KI Kinta Feira (04/12/2025) ne’e.
Sekretáriu Estadu Komunikasaun Sosiál Expedito Loro Dias Ximenes hateten, papél krusiál husi aliansa verifikadór faktu sira iha era intelijénsia dijitál hodi halo verifikasaun ba informasaun falsu sira ne’ebé mak espalla iha públiku.
“Papél krusiál husi aliansa verifikadór faktus sira iha era intelijénsia dijitál, ita tama ona iha era sirkulasaun informasaun la’o lais liu, duke kapasidade ema umanu nian hodi halo verifikasaun, teknolojia artefisiál intelijensia haforsa kestaun pozitivu balun, bele ajuda produsaun konteúdu ho lalais, analiza dadus no distribuisaun informasaun”, hateten Sekretáriu Estadu Expedito.
Governante ne’e hatutan, iha tempu hanesan artefisiál intelijénsia lori ba risku boot, risku foun informasaun falsu ne’ebé espalla ho lalais liu, fasil atu bele konvense ema no difisil liu buka hatene nia velosidade ne’ebé la’o lais liu.
Sekretáriu Estadu ne’e mós haktuir, informasaun falsu sira mak hanesan video falsu, audio falsu, no foto inventadu sira hodi fó influensia ba públiku.
“Fenomena hanesan video fake, audio falsu sira, foto inventadu no testu otomitizadu, influénsia muda opiniaun públiku nian, harahun reputasaun perturba prosesu demokrásia no ameasa estabilidade sosiál, ho akontesimentu sira ne’e prezensa ekipa aliansa verifikadór faktus, la’ós de’it sai komplementadór ne’ebé sai liña frente husi defeza ba lia-loos hodi fó protesaun ba entidade informasaun iha espasu públiku”, tenik Nia.
Iha sorin seluk Prezidente Konsellu Imprensa Timor-Leste, Antonio M.C.M. Mali dehan, iha lansamentu website aliansa verifikadór faktu ne’e, espera katak plataforma ida ne’e sei sai hanesan plataforma ida ba hodi kombate informasaun falsu sira ne’ebé espalla iha públiku.
Iha lansamentu website ne’e hetan partisipasaun hosi Sekretáriu Estadu ba Komunikasaun Sosiál Expedito Loro Dias Ximenes, Prezidente Konsellu Imprensa Timor-Leste, Antonio M.C.M. Mali, Konselleiru sira husi KI, Diretór ezekutivo KI, Polísia Nasionál Timor-Leste (PNTL), Média RTTL,ep, Tatoli.ip, GMN TV inklui média nasionál sira seluk. (Luis/Ana)
