Baucau/MetroFm; Proposta ne’ebé atu harii postu saúde foun iha suku Namanei postu administrativu Quelicai Antigu munisípiu Baucau seidauk hetan resposta husi Ministériu Sáude.
Liuhusi reportajen jornalista Feliciano Belo husi rádiu komunidade Baucau mai rádiu Metro Fm iha programa Metro Loron Ohin, tersa feira (09/12/2025) ne’e, Xefe Suku Namanei José Ximenes hateten, proposta atu harii Postu Saúde foun iha Quelicai manda ona ba Ministériu Sáude, maibé to’o agora seidauk hetan resposta husi parte relevante.
Xefe suku ne’e mós dehan, komunidade iha área ne’e hela iha difikuldade bainhira presiza asesu ba servisu saúde tanba distánsia dook tebes ba fasilidade saúde.
“Iha situasaun emerjensia povu tenke la’o distansia dook atu konsulta, ami hakarak governu haree atu bele harii sentru Saúde ida iha suku Namanei”, dehan José Ximenes.
Nia mós husu ba governu, liuhusi Orsamentu Jerál Estadu (OJE) atu konsidera projetu ida ne’e hanesan prioridade tanba komunidade presiza asesu fasil ba fasilidade saúde ne’ebé sai importante tebes iha moris loroloron.
Iha deklarasaun seluk José Ximenes afirma, komunidade iha suku ne’e iha abitante kuaze rihun rua resin no nia husu Ministériu Sáude toma atensaun ba problema real sira ne’ebé povu hasoru iha área remota hanesan Namanei.
To’o informasaun ne’e fó sai seidauk hetan konfirmasaun husi parte relevante.
Entretantu, Suku Namanei kompostu hosi aldeia haat ho totál família atus lima ruanulu resin lima. (Feliciano/Job/Ana)
